1,329 Бардыгы /

АЛА-БУКА. Ала-Бука районунун Көк-Серек айылын жергиликтүү эл черберлердин айылы деп коюшат.

Анткени Көк-Серек айылында уз-чеберлер көп. Алардын бири Пардакан Томуева. Ал чеберлердин бир нече республикалык, областтык кароо сынактарынын катышуучусу жана жеңүүчүсү. Пардакан мектепте окуп жүргөн мезгилинде эле айылда чебер кыз катары таанылган.  Ал алгач айылда беш чебер келин -кыздардын башын кошуп, “Седеп” тигүү цехин ачышып, элден түшкөн буйрутмаларды аткара баштайт. Алар турмушка чыгуучу кыздардын себин даярдап, туш кийиз, көшөгөлөрдү, жаш бөбөктөрдүн кийимдерин  эң мыкты тигип, кардарлардын алкоосуна арзып келет. Айылда чеберлерге элдин суроо талабы арта баштагандан кийин цехти чакан фабрикага айландыруу максатында Пардакан Томуева чет элдик донорлорго долбоор жазып 25 тигүү машинасын утуп алат. Эми өз каражатынын эсебинен 6 сотых жерди сатып алып, айылга чакан тигүү фабрикасын салууга кирише баштоодо. Келечекте фабрикада 30 кыз-келиндер иш менен камсыз болот. Бул фабриканын курулушуна мында эмгектенип жатышкан “Казак-Мыс” алтын кен комбинатынын жетекчилери да буйрутма бере тургандыктарын билдирип жатышат. Демек фабриканын келечеги чоң дейт Пардакан. Айылдагы тигүү фабрикасы бүтүп ишке түшсө, жаңы жумуш орундар ачылып, жаш уз-чеберлердин тобу өсүп чыгат.

Абдымомун КАЛБАЕВ, Ала-Бука району