822 Бардыгы /

ОШ. Ош шаардык сотунун чечимине ылайык Кара-Суу районундагы Савай Айыл Өкмөтүнүн башчысы Мунарбек Сайпидинов үй-бүлөлүк абалы эске алынып, ушул жылдын 11-мартына дейре үй камагына чыгарылды. Анткени, жергиликтүү Фемида Мунарбек Сайпидиновдун бөгөт чарасын карап, анын туруктуу жашаган жери бар экендигин, мамлекетке келтирилген 1 033 700 (1 миллион 33 миң 700) сомдук материалдык зыянды толугу менен төлөп берген эске алды.

Ошентип, соттун чечимине ылайык жергиликтүү аткаминер Мунарбек Сайпидинов Савай айылындагы үйүнөн тышкары чыгууга эч укугу жок! Ошондой эле тергөө учурунда суракка биринчи чакыруу менен келүүгө дагы милдеттүү! Мунун баарына Ош шаардык милициясы жоопкер, ал эми анын жетекчиси туруктуу көзөмөл кылууга тийиш. Анткени, Ош шаардык соту Мунарбек Сайпидиновдун Жазык Кодексинин 320-беренеси («Кызмат абалынан кыянаттык менен пайдалануу») боюнча шек саналып, кармалганы мыйзамдуу жана негиздүү деп тапкан. Баса, Мунарбек Сайпидинов Жазык Кодексинин 320-беренеси («Кызмат абалынан кыянаттык менен пайдалануу») менен сотко чейинки башталган териштирүү ишинин алкагында ушул жылдын 11-январында ишинде кармалган.

УКМК тараткан маалыматка таянсак, Кара-Суу районуна караштуу Савай айылындагы орто мектептин спорт залынын курулушунун суммасы 1 милион сомдон ашуун акчага ашыра бааланганы жана Мунарбек Сайпидинов башка дагы жооптуу жетекчилер менен кошо спорт залды сапатсыз бүтүрүлгөнүнө карабастан кабыл алганы кабарланган. УКМК ошондой эле Ош шаарындагы жана Ош облусунун аймагындагы түрдүү кылмыштарды жасаган уюшкан топту түзүү фактысы боюнча сотко чейинки териштирүүдө дагы Мунарбек Сайпидинов күбө катары өтүп келе жаткандыгын кошумчалаган.  

Мунарбек Сайпидинов Кара-Суудагы Савай Айыл Өкмөтүн 2016-жылдан бери жетектеп келатат. А түгүл былтыр 4-октябрда өткөн Парламенттик шайлоого «Мекеним Кыргызстан» саясий партиясынын тизмесинде 126-талапкер болуп катышкан эле. Ал – Мамлекеттик бажы кызматынын төрагасынын мурдагы орун басары, коррупцияга байланыштуу айыпталган Райымбек Матраимовдун өкүл баласы.

Алишер ТОКСОНБАЕВ “АЙМАК”