1,713 Бардыгы /

БИШКЕК. Жогорку Кеңеш депутаты Карамат Орозова Кыргыз-Тажик чек арасын коргоого такай жардамдашкан, а түгүл  аткезчиликке дагы катуу бөгөт коюуга аракет кылышкан активист жарандарды суракка тынбай чакырып, аларды камаганды токтотууну укук коргоо органдарынан ачык талап кылды. 

Жогорку Кеңеш депутаты Карамат Орозованын айтканынан караганда, чек арадагы былтыркы окуяларда 270 адам суракка алынган. Ал эми азыр эркектер калып, аялдар дагы чекесинен сурала баштаптыр.

• Эгерде жергиликтүү тургундар болбосо, чек арачылардын дагы,

укук коргоо органдарынын дагы мамлекеттик чек араны коргоого дегеле алы жетпейт! Аларды эзгенди качан токтотосуңар? Эл болбосо, силер чек араны таптакыр кайтара албайсыңар! Эмнеге патриот жигиттерди минтип сындырасыңар?!? Жергиликтүү бийликке, милицияга сөзсүз айткыла! Мындай ит адаттарын токтотушсун?Андан көрө өзүңөр барып чек араны кайтаргыла?!? — деп тызылдады Жогорку Кеңеш депутаты Карамат Орозова.

Кыргыз-Тажик чек арасындагы быйылкы апрель айындагы кандуу окуядан кийин Тажикстандан аткезчилик жол менен ташылган товарларга жергиликтүү тургундар абдан катуу каршы туруп жатышат. Маселен, быйыл 13-июлга караган түнү элдик күзөтчүлөр Баткен районунун Ак-Татыр айылында жүк ташуучу кичи автобустардын бирин токтотушкан. Андан болжол менен 4 тонна жүзүм табылган. Жүзүм Тажикстанда жүктөлүп, Лейлек району аркылуу өткөн. Унаалар кармалгандан кийин окуя болгон жерге укук коргоо органдарынын өкүлдөрү барышкан. Тилекке каршы, кийинчерээк ошол жергиликтүү тургундардан түзүлгөн элдик күзөтчүлөр тынымсыз суракка чакырылганы кабарланган.

Анткени менен Ички иштер министринин орун басары Октябрь Урманбетов мындай фактылар жок экендигин, эгерде бар болсо, токтоосуз териштирилээрин убадалады.

Алишер ТОКСОНБАЕВ, өз кабарчы