1,893 Бардыгы /

         Кыргызстандын Түштүк башкалаасынын Борбордук Аянтындагы  Дүйнөлүк пролетариаттын жолбашчысы Владимир Ильич Лениндин эстелигин башка жакка жылдыруу маселесин Ош шаарынын мэри Алмаз Мамбетов өзү демилгеледи. Бирок, буга коомчулук караманча каршы чыгууда. Эмнеге? Ушул жана башка суроолорубузга Кыргызстан коммунисттер партиясынын Ош шаардык комитетинин биринчи катчысы Апаз ЖЭЭНБЕКОВ жооп кайтарды.

• Апаз мырза, Ош шаарынын мэри Алмаз Мамбетов:

“Эстеликти алыш опоңой. Бирок, анда биздин тарыхыбыз катылуу. Балыкчы шаарынын мэри кезимде Владимир Ильичтин эстелигин жергиликтүү калктын суранычынын негизинде гана алганбыз. Ал эми Ошто дагы элдин каалоосун жана саясий жагын деле караштырганыбыз оң! Долбоорду шаардык Кеңештин депутаттары сунуш этип, алар менен акылдашып-макулдашып, Ленинди, балким, башка жакка жылдырып, ордуна Кыргыздын чыгаан инсандарынын айкелин орнотоорбуз!” – дебедиби. Муну Сиз кантип чечмелемекчисиз?

• Ыя, айланайын! Кыргызстандын Түштүк башкалаасынын

башчысынын эл дегени ким? Адегенде Ош шаарынын мэри Алмаз Мамбетов мага ушуну так жана даана чечмелеп берсинчи, айланайын? Калк дегени – коомубузда дагыле өз ордун табыша элек, колунда барлардын кулуна гана айланышкан туташ сабатсыз замандаштарыбызбы?

         Же мамлекетибиздин кызыкчылыгын баарынан жогору коюшуп, өмүр бою ак ниети менен таза гана эмгектенишип, азыркы дары-дармегине жетпеген, бирок, дагыле руханий жактан жогору кары-картаңдарыбызбы? Же өлкөбүздүн прогрессивдүү өңүттөгү жаштарыбы?

• Анан?
• Алишер үкам, тарыхты терең карсаңар? 1924-жылы Борбор Азияда

Өзбек ССРи, Түркмөн ССРи, Тажик ССРи түзүлгөн. Ошондо 850 миң гана калкы бар Кара Кыргыз автономиялуу облусу РСФСРдин (азыркы Орусиянын)  курамында түптөлгөн. Айтмакчы, ошондогу Кара Кыргыз автономиялуу облусунун түндүгүн – Казакстанга, ал эми түштүгүн Өзбекстанга кошуу маселеси көтөрүлгөндө, Дүйнөлүк пролетариаттын жолбашчысы В. И. Ленин өзү бул демилгеге караманча каршы турган. Эми дал ушул улуу инсанды, демек, тарых үчүн деле Кыргыз мамлекетинин негиздөөчүсү сыңары биз аздектөөгө түздөн-түз милдеткербиз! Биз, кыргыздар,  Улуу Октябрь Социалисттик революциясына дейре ким элек? Эми ким болдук? Ушул жакшылыктарды унутууга эч качан акыбыз жок, эй!

         КПССтин Программасында В. И. Лениндин директивасы менен Улуттук Кыргыз тилин, маданиятын, каада-салтын, социалдык жана экономикалык абалын оңдоп-жакшыртууга, ошого улай улуттук – Ата Мекендик кадрларды даярдап-тарбиялоого өзгөчө көңүл бурулган. 1917-жылга дейре 97 пайызы сабатсыз Кыргыз калкы өткөн ХХ кылымдын 70-80-жылдары илим-билими, көркөм өнөрү жана адабияты жагынан абдан ыкчам өнүгүп, Дүйнөлүк алкакта абдан дүңгүрөбөдүбү. Муну кантип танабыз?

• Муну менен Сиз эмне демекчисиз?
• Эгерде Дүйнөлүк пролетариаттын жолбашчысы В. И. Ленин азыркы

же туруму жок, же болочоктуу идеологиясы жок “демократтардын” жашоосуна чындап тоскоол этип жатса, анда Ош шаарынын булуң-бурчундагы Абдыкадыр Орозбековдун, Исхак Раззаковдун, Апсамат Масалиевдин, Султан Ибраимовдун – баарынын тең эстеликтерин жок кылуу керек! Анткени, мен жогоруда санактаган тарыхый инсандар бүт – Лениндин идеясына сугарылган чыныгы коммунисттер!

• Апаз мырза, эми кантесиз?
• Биз, Кыргызстандын коммунисттер партиясы Ош шаарынын мэри

Алмаз Мамбетовго атайын Кайрылуу жасадык. Анда жалпысынан үч жүйөөлүү талабыбызды кабыргасынан коюп олтурабыз. Биринчиси, Ош шаарынын Борбордук аянтындагы Дүйнөлүк пролетариаттын жолбашчысы В. И. Лениндин эстелиги Кыргызстандын баалуулуктарынын олуттуусу сыңары өлкөбүздүн ар тараптуу коргоосуна алынсын! Экинчиси: Владимир Ильия Лениндин эстелиги саясий эмес тарыхый эстелик катарында гана эсптелинип, мамлекет тарыбынан туруктуу корголоору ЖМКларда дагы байма-бай маалымдалсын! Үчүнчүсү: бардык жалпыга маалымдоо каражаттарында  Кыргызстан коммунисттер партиясы менен өздөрүн “демократ” атагандардын ортосунда тынымсыз уюштурулсун!  Ошондо гана бүгүнкү бүйүрдү кызыткан талаш-тартыштарга акыры биротоло чекит коюлат. Замандын талабы дагы ушундай.

Кепке тарткан: Алишер ТОКСОНБАЕВ