1,272 Бардыгы /

Орусияда Пенсиялык фонддун шаардык бөлүмдөрүнүн алдында президент Владимир Путин убадалаган балдарга жөлөк пул алууну каалагандардын узун кезектери жаралды.

«Медуза» басылмасынын маалыматына караганда, мындай кезек күтүүлөр Саратов, Красноярск, Барнаул, Чита, Сочи, Смоленск, Тюмень, Браянск жана башка шаарларда байкалууда. Алардын көбүндө жарандардын ортосундагы аралык сакталган жок.

12-майдан тартып иштей баштаган Мамлекеттик кызмат көрсөтүүлөр порталындагы сайт арыз берүүнү каалагандардын көптүгүнөн улам алгачкы сааттарда мүчүлүштүктөр менен иштегени кабарланган.

«Коммерсант» басылмасы өлкөнүн Байланыш министрлигине шилтеме кылып, порталда мүнөт сайын балдарга жөлөк пул берүү боюнча эки миңден ашык арыз кабыл алынып жатканын жазды. Сайт аркылуу 20 сааттын ичинде 2 миллиндон ашык жаран электрондук формада арыз берген.

Ал ортодо интернетте балдарга жөлөк пул берүү арыздарын кабыл алуу боюнча ондогон алдамчы сайттар пайда болгону кабараланууда.

11-майда президент Владимир Путин коронавирус эпидемиясынын кесепеттерине байланыштуу үй-бүлөдөгү 3 жаштан 15 жашка чейинки ар бир балага 10 миң рублдан берилерин билдирген. Төлөмдөр 1-июнда башталып, арыз кабыл алуу 1-октябрга чейин уланат.

Бийликтин маалыматы ылайык, жалпысынан жөлөк пулду 27 миллион бала ала алат.