21 Бардыгы /

Кыргыз Республикасынын Улуттук статистикалык комитети 2023-жылдын жыйынтыгы боюнча Кыргызстандын экономикасынын реалдуу секторундагы ишканалардын жана компаниялардын рейтингин жарыялады. Бул рейтингди даярдоо учурунда Улуттук статистика комитети 29 миңден ашык ата мекендик ишкананы анализдеген. Консолидацияланган рейтингде «Кепилдик фонд» ААКты 100-орунда турат. Бул тууралуу аталган мекеменин коомчулук менен байланышуу бөлуму билдирди.

Консолидацияланган рейтингди даярдоодо ишкананын кызматкерлеринин саны, анын кирешеси, дүң кирешеси, операциялык ишмердүүлүктөн түшкөн пайда жана чыгым, балансталган финансылык натыйжалар сыяктуу критерийлер эске алынган.

Эске сала кетсек, «Кепилдик фонд» ААКтын ишмердүүлүгү Кыргыз Республикасынын бүткүл аймагында күрөөлүк камсыздоо жетишсиз болгон учурда кепилдиктерди берүү жолу менен чарбакер субъекттердин финансылык ресурстарга жеткиликтүүлүгүн камсыздоого багытталган.

Аймактардагы ишкерлерди колдоо “Кепилдик фонд” ААКтын ишмердигинде артыкчылыктуу багыт болуп саналат, айыл чарба тармагына, өнөр жайга, туризмге, ипотекага, ошондой эле экспортко багытталган жана импортту алмаштыруучу ишканаларга өзгөчө көңүл бурулат.

8 жылдык ийгиликтүү ишмердүүлүк жана анын негизги көрсөткүчтөрү “Кепилдик фонд” ААКты биздин өлкөдө жаңы, уникалдуу каржы институту катары өз убагында түзүлгөндүгүн көрсөтүп турат жана күтүүлөрдү толугу менен актап жатат.

2016-жылдан 2024-жылдын 9 октябрына чейинки ишмердүүлүгүнүн бүткүл мезгили үчүн «Кепилдик фонд» ААКтын тарабынан ишкердик субъекттерине кепилдик колдоо көрсөтүлүп, 10 миллиард 628 миллион сомдон ашык суммага 10 687 кепилдик берилип, атамекендик бизнеске 32 миллиард 879 миллион сомдон ашык суммадагы кредиттик каражаттарды алууга мүмкүнчүлүк түзүлдү.

Үстүбүздөгү жылдын 9 октябрына “Кепилдик фонд” ААКты өлкө бизнесине кепилдик колдоо көрсөтүп, 2 миллиард 511 миллион сомдон ашык суммага 2 521 кепилдик берди, бул ата мекендик бизнеске 6 миллиард 944 миллион сомдон ашык суммадагы кредиттик каражаттардын жеткиликтүүлүгүн камсыз кылды.