2,652 Бардыгы /

ОШ. Кыргызстандын Түштүк башкалаасында жайланышкан «Кыргыз Унаа Курулуш» заводу мамлекетибиздин эгемендүүлүк күнүнө карата биринчи электробусту пайдалануу тапшырат. Бул жөнүндө аталган ишкананын директору Абдуманап Кудайбердиев шардана кылды.

«Кыргыз Унаа Курулуш» заводунун директору Абдуманап Кудайбердиев Ош шаарынын мэринин милдетин аткаруучу Алмаз Мамбетовду ишкана менен тааныштырып жатып, ишкана аз жүк көтөрүүгө ылайыкташкан жүк ташуучу автоунааларды, тез жардам машиналарын, суу түтүктөрүн, генераторлорду, акылдуу эсептегичтерди жана лифтилерди чыгаарууга абдан батыл киришкендигин билдирди. Ушул тапта ишканада 350 адис эмгектенет. Жакында реструктуризация жараяны аяктаса, Кең-Сай массивиндеги жаңы имаратта дагы 1000-1500 киши иштей туургандыгы күтүлүүдө.

• Жергиликтүү  калк биздин продукциябызды абдан эле активдүү

колдоноорунда менин эч кандай шегим жок! – деди «Кыргыз Унаа Курулуш» заводунун директору Абдуманап Кудайбердиев. – Анткени, бизден өндүрүлгөн электротрансформаторлорго кардарлар эмитен эле көбөйдү. А түгүл Бишкектен дагы буюртмалар түшүүдө. Айрыкча «Түндүкэлектро» ачык акционердик коому менен тыгыз кызматташып, башкалаабызда акылдууу эсептегичтерди соодалачу кеңсе дагы ачтык. Жыл сайын 50-100 миң акылдуу эсептегичтерди чыгарууну пландаштырып жатабыз. А түгүл буларды сыноодон ийгиликтүү өткөндөн кийин Өзбекстанга жана Казакстанга дагы байма-бай сатууну мерчемдеп жатабыз.

Соңку тапта «Кыргыз Унаа Курулуш» заводу  DongFeng үлгүсүндөгү аз жүк көтөргөн жүк ташуучу машиналарды дагы чыгармакчы. Бул өңүттө ишкана алдыңкы немис технологиясы менен толук кандуу камсыз этилди. А бул деген өндүрүлгөн продукциянын сапатын туруктуу камсыздайт дегенди туюндурат. Мындан тышкары аталган ишкана бара-бара энергетикалык жана машина куруу жабдыктарын дагы үзгүлтүксүз өндүрүүнү бекем пландаштырууда.

Алишер ТОКСОНБАЕВ, өз кабарчы