1,251 Бардыгы /

ОШ. Быйыл дагы Ош алдыга оззонго жетишти. Ошентип, республикалык “Жылдын мыкты тарбиячысы – 2022” сынагынын жыйынтыгында Ош шаарындагы №39-“Күн нуру” балдар бакчасынын тарбиячысы Гульназа Туленбаева биринчи орунду багындырды.

Экинчи байгелүү орунга Талас облусунун Манас районундагы “Байчечекей” балдар бакчасынын тарбиячысы Эркинбек кызы Мунарага, ал эми үчүнчү орунга Ош облусунун Алай районундагы №1-балдар бакчанын тарбиячысы Арапаткан Туменовага татышты. Бишкекте эки күн бою “Мыкты жыл мугалими” жана “Мыкты жыл тарбиячысы” республикалык сынагынын IV этабына жети  дубандан мыктынын мыктысы тандалып келишип, билим таймашында өз ара күч сынашышты.

Калыстар тобунун баамында, таймашкандардын арасынан эң мыктысын аныктоо абдан эле кыйынга турду. Муну катышуучулар жана алардын күйөрмандары калыстардын чечим чыгаруу убактысы узакка созулгандан улам баамдап атышты. Кантсе дагы, ар бир мелдеште жеңүүчү сөзсүз болуусу абзел! Муну аныктоо калыстар үчүн дагы өтө оор иш экендиги эми гана билинди.  Калыстар тобунун төрайымы, Ишеналы Арабаев атындагы КМУнун доценти Токтобүбү Орусбаева туура баамдагандай, республикалык деңгээлдеги таймашка ар бир катышуучу өзүнүн аймагынын ар-намысын коргоп келгени эле чоң жеңиш, чоң эрдик эмеспи.

— Биз үчүн татыктуулардын татыктуусун тандоо абдан эле кыйынга турду. Анткени, ушул жерге келгендердин баары — жеңүүчүлөр экени талашсыз! Бирок, таймаш деген таймаш, мыктылардын арасынан дагы мыктысын иргөө вазийпасын акыйкат, так аткарганга аракеттендик. Ош шаарынан келген талапкер эмнеси менен айырмаланды? Ал тайпадагы балдарга бирдей форма даярдап келиптир. Кыйын педагог кайда барбасын, өзүнүн чеберчилиги менен балдарды өзүнө тартып алат жана бир өзгөчөлүктү сөзсүз таба билет. Биз Гульназадан дал ушул чеберчиликти байкадык. Анын үстүнө, биздин баамыбызда, Оштун жетекчилиги педагогдорго мотивация берүүнү мыкты өздөштүрүшүптүр. Облустук турларда жеңген жеңүүчүлөргө батир, анан дагы машина тартуулап жатышкандыгын угуп-көрүп жатабыз. Бул албетте, ар бирин алдыга сүрөп, жеңишке гана жетелейт. Былтыр дагы Оштон келген тарбиячы баш байгеге ээ болгону эсибизде, — деди калыстар тобунун төрайымы, Ишеналы Арабаев атындагы КМУнун доценти Токтобүбү Орусбаева.

Ошентип, баш калаабыздагы Кыргыз улуттук Абдылас Малдыбаев атындагы опера жана балет театрында “Жылдын мыкты тарбиячысы – 2022” сынагынын жеңүүчүлөрүнө байгелери тапшырылып, баары тең сыйланышты.

Алишер ТОКСОНБАЕВ, өз кабарчы