894 Бардыгы /

          Баткен жана Ош облустарынан жана дагы Ош шаарынан иргелген 5 мектептин окуучуларынын арасында «Жаркын келечектин экологдору» аталышындагы эко-акыл ордо сынагы жыйынтыкталды. Буга дейре аталган сынактын тандоо баскычы – Баткен облусунун Кадамжай райондук мектеп лицейинде, Ош облусунун Кара-Суу районунундагы Сыдык Алайчы уулу, Шабы Жумаев, Кумар Момбеков атындагы орто мектептеринде жана Ош шаарындагы «Жетиген» мектеп-лицейинин жогорку класстарынын окуучуларынын арасында өткөрүлгөн эле.

          Финалга чыгышкан аталган мектептердин 10-класстарынын окуучулары, Ош шаарындагы «Жетиген» мектеп-лицейинде 3 бөлүк менен таймаш өткөрүштү. Алар саламдашуудан тартып, kahoot тиркемесинин жардамындагы капитандардын сынагына дейре ат салышып, тийиштүү суроолорго дагы жооп кайтарышты. Жыйынтыгында Батккенн облусундагы Кадамжай райондук мектеп лицейинин окуучулары 1-орунду, К.Момбекова атындагы орто мектебинин окуучулары 2-орунду, ал эми Ш.Жумаев атындагы орто мектебинин окуучулары 3-орунду ээлешти. Командаларга дипломдор, ыраазычылык каттар, экобаштыктар жана кызыктуу китептер дагы тапшырылды. Аталган иш-чаранын эң башкы максаты – окуучуларды экологиялык маданиятка тарбиялоо менен бирге интеллектуалдык дараметин ого бетер жогорулатуу, эко-акыл ордо аркылуу экологиялык жаңы билимдерди жайылтуу.

          Кошумчалай кетээрибиз: «Жаркын келечектин экологдору» аталышындагы эко-акыл ордо сынагын NABU-Кыргызстан уюмунун Түштүк филиалынын «Экологиялык билим берүү» тобу уюштурду. Аталган уюм жаратылышты жана андагы жапайы жан-жаныбарларды, айрыкча ак илбирсти коргоо менен алектенет. Анын алкагында бала бакчадан тартып, мектеп окуучуларына, ЖОЖдордун студенттерине жана жергиликтүү тургундарга чейин жаратылышка аяр мамиле кылууну пропагандалап, аларга экологиялык билим берет.

Алишер ТОКСОНБАЕВ, өз кабарчы