ЗАМАНБАП АДИСТЕРДИ ДАЯРДАШАТ

9 Бардыгы /

Ош облусуна караштуу Ноокат районундагы №58-кесиптик лицей адегенде 1972-1974-окуу жылында Караван кыштагындагы Мусаев атындагы №8-кесипчилик-техникалык окуу жайынын (КТОЖдун) филиалы сыңары ишин баштаган. Андан ары 1982-1984-жылдары Ноокат районундагы Жаңы-Базар кыштагында жайланышкан №54-КТОЖдун филиалына айландырылган. Ош облусунун баштапкы кесиптик билим берүү башкармалыгынын 1984-жылдын 1-прелиндеги буйругуна ылайык Ноокат раЙонундагы №58—айылдык кесипчилик-техникалык билим берүү окуу жайына (СПТУга) айландырылган. Кийинчерээк заман талабына жараша 2008-жылдан тартып №58-кесиптик лицейге дароо өзгөртүлгөн.

Адегенде биздин окуу жайыбыз 3 жылдык мөөнөт менен

кеңири профилдеги тракторист-машинисттерди гана даярдаган. Ал эми 1984-жылдан тартып 2009-жылга дейре 3 жылда кеңири профилдеги тракторист-машинисттерди, 10 айда азык-түлүк продукцияларын сатуучуларды, электромонтерлорду, «С» категориясындагы айдоочуларды, 3-разряддагы тигүүчүлөрдү, жыгач усталарды жана тамекчилик устаттарын даярдоого гана ыктаганбыз, – деди Ноокат районундагы №58-кесиптик лицейдин директору Шайыргүл КАРИМОВА.

–Биз бара-бара заман талабына жараша электр жана газ ширетүүчүлөрүн, кыш кыноочуларды, Айыл чарба өндүрүшүнүн устаттарын, тигүүчү жабдууларынын операторлорун, автослесарларды даярядаганга дага батыл кириштик, – деп кепке аралашты Ноокат районундагы №58-кесиптик лицейдин мугалими Вахитжан РУЗАЛИЕВ.

Шахноза КУДАЙБЕРДИЕВА, Ноокат районундагы №58-кесиптик лицейдин кыргыз тили жана адабияты сабагынын мугалими: – Биздин лицейибизде Кыргыз тилин мамлекеттик тил сыңары гана милдеттүү түрдө окутабыз. Курсанттарыбыз ошондой эле Кыргыз адабиятын дагы милдеттүү түрдө үйрөнүшөт. Эң башкысы: ушул тапта Кыргыз тили IT технология тармагында дагы байма-бай колдонулуп жатпайбы. Андыктан, мындай адат окутуу сапатын ого бетер жакшыртты.

Абдыпар БЕККЕЛДИЕВ, Ноокат районундагы №58-кесиптик лицейдин ага устаты:

– Биз шакирттерибизди абдан мыкталып камдап жатабыз. Көз тийбесин! Арабызда устаттарыбыздан дагы өтүп, алардан мыктылап иш жүргүзүп жаткандардан деле куру эмеспиз! Биз деле ошондой эмгегинен баар тапкан уул-кыздарыбыз менен, албетте, дайыма сыймыктанабыз!

Кепке кайрадан кошулган Ноокат районундагы №58-кесиптик лицейдин директору Шайыргүл КАРИМОВА ушул тапта ал жетектеген кесипчилик-техникалык окуу жайы кулачын дагы ого бетер кеңейтип жаткандыгын шардана кылды.

Байкагандырсыздар. Коомубуз улам ыкчам гана өзгөрүп

баратпайбы. Биз ушул талапты дагы бекем көңүлгө түйүп, ушул тапта Айыл чарба өндүрүшүнүн устаты (фермер), тигүүчү, өсүмдүк өстүрүүчү, ашпозчу, токарь, веб-программист, автоэлектриктерди белендегенге деле өтө бекем кириштик, – деди Ноокат районундагы №58-кесиптик лицейдин директору Шайыргүл КАРИМОВА. –Кыргызстандын өндүрүшү деле бара-бара өркүндөп, кулачын улам кеңири жайып баратпайбы. Демек, бул өңүттө биз деле жамбаштап жаткан жерибиз жок!

Бизди кубандырганы: Ноокат районундагы №58-кесиптик лицейин бүтүргөндөргө жумуш опоңой гана табылат. Аталган билим жана кесип уясынан учкандар ушул тапта Кыргызстанда гана эмес, Орусия, Түштүк Корея, Америка жана Европа өлкөлөрүндө дагы камчы салдырбастан иштеп жүрүшөт. Эмесе, ушул тейиңден жазба, №58-кесиптик лицей!