51 Бардыгы /

Алмалык айылы Ош шаарындагы анклав сыңары эсептелчү. Анткени, бул кыштак Ош облусундагы Ноокат районунан Ош шаарынын карамагына өткөрүлгөнү менен, дээрлик каралбай калган.

Андыктан, Ош шаарынын мэри Бакытбек Жетигенов Алмалык айылында курулушу бүткөрүлгөн мектепти жеринде көрүп чыкты. Муниципалитеттен билдиришкендей, шаар башчысы мектеп пайдаланууга берилген соң, окуучулардын билим алуусуна, өнүгүүсүнө жаңы мүмкүнчүлүктөрдү түзөөрүн билдирди. 2 кабаттан турган мектеп өз мөөнөтүндө бүткөрүлүп, 150 окуучуга ылайыкташкан. Билим берүү мекемесинде спорт аянтчасы, кичи футбол талаасы, жыйындар залы, ашкана, откана жана башка зарыл заманбап бардык шарттар түзүлгөн.

Эске салчуу жагдай: буга чейин Ош шаарынын мэри Бакытбек Жетигенов Алмалык айылынын тургундары менен жолугушуусунда жергиликтүү тургундар жаңы мектеп куруп берүүнү суранышкан эле. Ага ылайык калаа башчысы  жашоочуларга берген убадасын аткарып, мектептин курулушу бир жыл аралыгында толук бүткөрүлдү.

Алишер ТОКСОНБАЕВ, өз кабарчы