Кайрымдуулук акциясы МАДАНИЯТТЫ КОЛДОО –КЕЛЕЧЕКТИ КОЛДОО

2,794 Бардыгы /

ОШ. Ош облусундагы Кара-Суу районунун Жоош айыл аймагында кийинки жылдарда спорттук жана маданий иш-чараларды өткөрүүгө олуттуу көңүл бурулуп жатат. Жакынкы жылдарда эле бир катар айылдарда спорттук залдар пайдаланууга берилип, жаштар бош убактыларын ден соолугун чыңдоо менен өткөрүүгө жумшоого мүмкүнчүлүк түзүлдү.

Ошондой эле айыл маданиятын көтөрүүгө да олуттуу маани берилип жатат. Аймакта жашаган ыр-бийге шыктуу апалардан түзүлгөн «Кутман эне» фольклордук ансамблдин аты далайга угулуп калган. Мамажан айылындагы №41-Т.Бердибеков атындагы орто мектепте айылдын тарыхын чагылдырган музей ачылган. Жакында ушул мектепте кыргыз элине аты таанымал болуп калган белгилүү акын-жазуучулардын, маданий ишмерлердин, искусство чеберлеринин, жана жергиликтүү бийлик өкүлдөрүнүн катышуусу менен маданий кайрымдуулук акциясы болуп өттү.

Бул салтанатты Т.Бердибеков атындагы орто мектептин директору Камчыбек Залиев ачып, сөздү КР маданият, маалымат жана туризм министрлигинин улуттук маданий борборунун руханий мурастарды жайылтуу серастарды жайылтуу секторунун башчысы Топчубай Досбаевге берди.

Ал маданиятты колдоо –келечекти колдоо экендигин белгилеп өтүп, бүгүнкү иш-чараны айыл маданиятын көтөрүүгө башталган кадам катары баалоо менен, анын ишине ийгилик каалады. Эгерде бул багыттагы жумуштар ойдогудай уюштурулган болсо, мындай демилге башка аймактарда да улантылып кетерине ишенгендигин билдирди. Ал сөз аягында мектептин өздүк-көркөм ийриминин катышуучулары үчүн өзү ала келген драмалык чыгармалардын кейипкерлеринин образдарын ача турган 300гө жакын атайын кийимдерди тапшырды.

Андан кийинки сөзгө чыккан «Этно Ош» маданиятты колдоо фондусунун төрагасы М.Исаев мындай иш-чараны мектеп окуучуларынын арасында өткөрүү жаш муундарды маданиятка болгон кызыгуусун арттырууга көмөк боло тургандыгын айтуу менен, мындай иш-чараларды башка аймактарда да улантуунун зарыл экендигин белгилеп өттү. Андан кийин фонддун фольклордук тобу музыкалык мастер класс тартуулады.

Майрамдык маанайда өткөн бул акцияда анын катышуучуларына манасчы М.Сапаралиев,белгилүү ырчы Самара Каримова өнөрлөрүн тартуулашты.

Салтанаттын аягында элдин атынан сүйлөгөн аксакалдар ушул чараны уюштургандарга жана элдин маанайын көтөргөн аткаруучуларга ыаазылыгын билдиришип, батасын беришти.