1,868 Бардыгы /

Кыргыз Республикасынын Президенти  Алмазбек Атамбаев   Ноокат шаарына келип, райондук музейдин
Н.Исановго арналган бөлүмүндөгү эспонаттар менен таанышып,   райондук эс алуу паркында тургузулган Н. Исановдун айкелин ачуу аземине катышты. Ага Кыргыз
Республикасынын  Премьер-министри
Ж.Ж.Сатыбалдиев, Жогорку Кеёештин төрагасынын орун басары Төрөбай Зулпукаров,
парламенттин бир катар депутаттары, министрлер, Ош, Жалал-Абад жана Баткен
облустарындагы атайын ыйгарымдуу өкүлдөрү, Н.Исановдун үй-бүлөсү, достору,
жакындары жана райондун коомчулугу келди. 

Салтанаттын жүрүшүндө Президент өз сөзүн
Н.Исановдун  Арашандагы үйүндө конок
болгондугун, аны менен мамлекеттин экономикасы, өндүрүшү жөнүндө болгон
маегин,  мындан ары бирге болуу
максаттары  тууралуу эскерүү менен
баштады.  Ал Насирдин агайдын  ошондон кийин күтүлбөгөн жерден көз жуумп
калганда, бул кабар ага өтө оор тийгендигин айтуу менен   Кыргызстандын тарыхында  С.Ибраимов менен Н.Исановдун  күтүлбөгөн кырсыктан мерт кеткендигин өкүнүү
менен белгиледи. Балким, Кыргызстандын башында аларга окшогон мыкты адамдар турганда мамлекетибиз мынчалык кыйынчылыкка кептелбейт беле деген  пикирин ортого салды.

Насирдин Исановдун өмүрү кыска болсо да ал
жылдыздай жаркырап жанып өткөндүгүн, анын аты алтын тамгалар менен жазылып
калгандыгын баса белгилеп, Ноокат жергеси ага окшогон  мамлекетти ойлогон жигиттерди берет деген
ишенимин билдирди.

Андан кийин Н.Исановдун досу, коомдук ишмер
Мейражидин  Зулпиев  сөз алып, Президенттин кийинки учурда   С.Ибраимов, А.Масалиев жана Н.Исанов сыяктуу
залкар инсандардын  айкелдерин ачууга
катышкандыгын эл–журт  мамлекет
башчысынын аларга болгон сый-урматы деп түшүнүп жаткандыгын айтуу менен алардын
рухтары өлкөбүздүн өнүгүүсүнө колдоо көрсөтөт деген ишенимин  билдирди.

Андан кийин Насирдин Исановдун кызы  Мария Исанова чыгып сүйлөп, анын атасы үй-бүлөсүнө,
туугандарына  материалдык байлык калтырбаса
да, ал тазалыкты, чынчылдыкты мураска калтыргандыгын сыймыктануу менен эскерди.

Төлөнбай Абыразаков  -Ош областы