1,008 Бардыгы /

ЖАЛАЛ-АБАД. Кечээ, 23-ноябрда Жалал-Абад шаарынын Тайгараев аймактык башкармалыгына караштуу Сатыбалды Жээнбеков айылында 50 орундуу бала бакчасынын ачылуу аземи болуп өттү.  

Жалал-Абад шаардык мэриясынын маалымат борбору билдиргендей,

Тайгараев аймактык башкармалыгына караштуу Сатыбалды Жээнбеков айылында 50 орундуу 2 кабаттан турган №22 “Алтын тепкич” бала бакчасынын курулушу аяктап, пайдаланууга берилди. Бакчанын ачылуу аземине Жалал-Абад шаарынын  мэри Эрнисбек Ормоков, шаардык кеңештин депутаттары Жыргалбек Маатжакыпов, Бабаравшан Каримов, шаардык билим берүү бөлүмүнүн башчысы Рысбек Калчаев жана жергиликтүү тургундар катышты. 

2021-жылы курулушу башталган бакча бир жыл аралыгында бүткөрүлдү. Бакчада  балдар ойноочу аянтча, эки бастырма, бакчаны жылытуу үчүн откана курулган. Бакчанын курулушуна жергиликтүү бюджеттен 17 млн. 754 миң сом акча каражаты сарпталды. Жаңыдан ачылган №22 “Алтын тепкич” балдар бакчасы эки кабаттан туруп, жеткинчектер үчүн бардык шарттар жаратылган. 

Эскерте кетсек, жыл башынан бери жергиликтүү бюджеттин каржылоосу менен шаарда 180, 100 жана 50 орундуу үч бала бакча пайдаланууга берилди.

Жалал-Абад шаарында учурда төрт миңден ашуун жеткинчек бала бакчага барат.