660 Бардыгы /

          БИШКЕК. Ноокаттын автожолу – бул жолу эл аралык маанидеги жол. Министрликтин тарыхында биринчи жолу мамлекеттик ишкана гана бул трассаны республикалык бюджеттин каржылоосу аркасында куруп жатат. Бул туурасында транспорт жана коммуникациялар министри Тилек Текебаев шардана кылды.

          Өкмөттүн мүчөсү Тилек Текебаевдинайтымында, президенттин колдоосу менен иш бекитилген пландын негизинде жүрүп жатат, Ноокаттын жолу 2016-жылдан бери убада бойдон калып башталбай келген. Ошондуктан, аталган автожол министрдин жана жогорку кызматтагы жетекчилердин түздөн-түз көзөмөлүмдө турат.

          – Ноокаттын жолу жеке мага эле эмес, жаңыдан түптөлүп келе жаткан «Кыргызавтожол» мамлекеттик ишканасына дагы чоң сыноо! Жетекчилик талап кылган мөөнөттө бүтүрүүгө болгон аракетибизди жумшайбыз. Ошол эле учурда сапатына дагы абдан басым жасап, бардык талаптарды так сактоо тапшырмасын тиешелүү жетекчилерге бердим. Мамлекет башчыбыздын колдоосу аркасында амбициялуу долбоорлорду баштадык. Буга чейин өлкө жолдорун көбүнчө чет өлкөлүк жеке компаниялар куруп келсише, эми өзүбүздүн мамлекеттик ишкана куруп баштады. Мамлекеттик жана ата мекендик жеке компанияларга ишенбей жүрө берсек, жолдорду курууда тажрыйбабыз жок болуп, ошондой эле бул тармакка бөлүнгөн каражаттын көпчүлүгү сыртка чыгып кетмек, — деп кашкайган чындыкты моюндады транспорт жана коммуникациялар министри Тилек Текебаев.

          Ошентип, Тилек Текебаев президенттин жеке колдоосу аркасында гана аталган министрликтин алдындагы мамлекеттик ишканага 265 жаңы техникалар сатып алынгандыгын жана дагы техникалар келээрин кошумчалады. Анын айтымында, бул аракет келечекте өлкө жолдорун толугу менен сапаттуу оңдоого гана багытталган.

          Министр Тилек Текебаев баса белгилегендей, Ош – Баткен – Раззаков Ош-Баткен-Раззаков унаа жолунун 0-75-чакырым аралыгы Ош облусунун аймагында жайгашкан. Анын ичинен 0-6-чакырымы Ош шаары, 6-11- чакырымы Кара-Суу району, 11-75-чакырымы Ноокат району (38-41-чакырымы Ноокат шаары) аркылуу өтөт. Негизинен унаа жолдун 0-30-чакырымы №21 Жол тейлөө ишканасы, 30-75-чакырым аралыгы №37 ЖТИси тарабынан тейленет. А азыркы учурда Ош – Баткен – Раззаков унаа жолунун (Ноокат району) 27,9 – 34,4 жана 40,35 – 46,910-чакырым аралыктарын калыбына келтирүү иштерин республикалык бюджеттин эсебинен Транспорт жана коммуникациялар министрлигине караштуу «Кыргызавтожол“ мамлекеттик ишканасы аткарып жатат.

Алишер ТОКСОНБАЕВ, өз кабарчы