10,923 Бардыгы /

ЖАЛАЛ-АБАД. Жолдун ачылуу аземине Кыргыз Республикасынын Президенти Садыр Жапаров, Министрлер кабинетинин төрагасынын орун басары-УКМК төрагасы Камчыбек Ташиев, Президенттин Жалал-Абад облусундагы ыйгарым укуктуу өкүлү Абсаттар Сыргабаев, Жалал-Абад шаарынын мэри Эрнисбек Ормоков, шаардык кеңештин төрагасы Нуртилек Орозбаев баштаган депутаттар жана жергиликтүү тургундар катышты.

Жолдун ачылуу аземинде Президент Садыр Жапаров Жалал-Абад шаарынын борбордук көчөсүнө Кыргыз Эл акыны Түмөнбай Байзаковдун ысымынын берилишин жана проспектинин башталышындагы стелага аты-жөнүнүн жазылышын маданият чөйрөсүндө өзүнүн ордун тапкан чыгаан инсандын эмгегин баалоо, ошол эле учурда ысымын түбөлүккө сактоого болгон туура чечим деп белгиледи. Ошондой эле, Түмөнбай Байзаковдун 100 жылдыгына карата республикалык деңгээлдеги бир катар иш-чаралар өткөрүлө тургандыгын билдирди.

Т.Байзаков проспектисинин жалпы узундугу 3,5 чакырымды, кеңдиги 18-31 метрди түзөт. Жолду реконструкциялоонун алкагында жаңыдан геосетка менен асфальт төшөөдөн сырткары, тротуар куруу, темир-бетон арык куурларын жаткыруу, жол чийиндерин чийүү жана жол белгилерин орнотуу жумуштары жасалды.

Курулушка жалпы 145 млн. 851 сомдон ашуун каражат жумшалды. Каржылоо Жалал-Абад шаарын өнүктүрүүгө республикалык бюджеттен бөлүнгөн 2 млрд. сомдун эсебинен жүргүзүлдү.

Белгилей кетсек, Жалал-Абад шаарындагы Т.Байзаков проспектиси буга чейин Ленин көчөсү деп аталып келген. Ал шаардык кеңештин токтому менен 23-августта өзгөртүлгөн.