504 Бардыгы /

ЖАЛАЛ-АБАД. Бүгүн, 30-апрелде Ыйгарым укуктуу өкүлчүлүктө Кыргыз Республикасынын Конституциясынын кабыл алынгандыгынын 31 жылдыгы белгиленди.

Иш-чарага Кыргыз Республикасынын Президентинин Жалал-Абад облусундагы ыйгарым укуктуу өкүлү Абсаттар Сыргабаев, облустук мекеме-ишканалардын жетекчилери, укук коргоо органдарынын кызматкерлери, жогорку окуу жайлардын мугалимдери жана студенттер катышты.

Салтанатта облус башчысы конституция — Кыргызстандын дүйнө коомчулугунда демократиялуу мамлекет катары ордун бекемдөөгө, саясий жана экономикалык реформаларды жүргүзүүгө укуктук негиз болуп саналаарын белгиледи.

“Баш мыйзам биздин күнүмдүк жашообуздун ажырагыс бѳлүгү болуп эсептелет. Ал элибиздин, чыныгы эркиндиктин жана демократиянын шарттарында, адилеттүү жана укуктук коомдо жашоого умтулуусун далилдейт. Баарыңыздарды дагы бир жолу укуктук таянычыбыз болгон — Конституциянын кабыл алынган күнү менен куттуктайм!”–деди Абсаттар Сыргабаев.

Жыйындын жүрүшүндө укук коргоо органдарынын кызматкерлери тарабынан Кыргыз Республикасынын Конституциясынын тарыхы жана өнүгүү жолундагы өзгөрүүлөр тууралуу баяндама жасады. Мындан сырткары облустук филармониянын кызматкерлери тарабынан чакан концерттик программа тартууланды.

Эске салсак, Жогорку Кеңеш 1993-жылдын 5-майында Кыргызстандын эгемен тарыхындагы алгачкы Конституцияны кабыл алган. Анда бийлик бутактарынын ыйгарым укуктары жана мамлекеттик түзүлүштүн негиздери аныкталган.