405 Бардыгы /

Жекшемби күнү болжол менен 17:40 чамасында Бишкек-Ош жолунун 410-чакырымында тоо боорунан чоң таштар кулап, жолду жаап калганына байланыштуу автоунаа кыймылына чектөө киргизилди. Бул тууралуу Ички иштер министрлигинин Жол кыймылынын коопсуздугун камсыздоо башкы башкармалыгы билдирди.

Маалыматка караганда, Бишкек-Ош автоунаа жолунун Кара-Көл шаарынын Туннел посттунан тартып, Таш-Көмүр шаарчасына чейинки (447-495-чакырымдар) аралыгында автоунаалар убактылуу топтоп турат. Жол кыймылынын коопсуздугун камсыздоо башкы башкармалыгы жолду тазалоо иштери жүрүп жатканын, каттам калыбына келгенде кошумча маалымат берилерин белгиледи. Жабыркагандар тууралуу маалыматтар айтылган жок.

Бирок, Социалдык түйүндөргө тараган видеолордон жолду чоң таштар тосуп калгандыгын, эки тарапта автоунаалардын тыгыны пайда болгондугун, айдоочулар жана жүргүнчүлөр таштарды өздөрү эптеп жылдырып жаткандыгын көрүүгө болот.

Алишер ТОСКОНБАЕВ, өз кабарчы