6 Бардыгы /

Кыргыз Республикасынын Министрлер кабинетинин төрагасынын орун басары – Улуттук коопсуздук мамлекеттик комитетинин төрагасы Камчыбек Ташиев Ош шаарынын Төлөйкөн айыл өкмөтүндө жайланышкан «Жеткинчек» балдардын ден соолугун чыңдоо борборуна күтүүсүздөн баш бакты.

Баса, «Жеткинчек» балдардын ден соолугун чыңдоо борбору буге дейре Профсоюздар уюмунун балансында катталып, эскилиги эбак жетип, дээрлик жараксыз абалга кептелген. 1978-жылы пайдаланууга тапшырылган бул пионер лагери ошондон бери бир жолу дагы капиталдык оңдоп-түзөөдөн өткөн эмес. Балдарды да жетиштүү эс алдырууга шарттары келбей калган. Эми бул лагерь УКМКнын Ош Башкы башкармалыгынын балансына өткөрүлдү.

Кыргыз Республикасынын Министрлер кабинетинин төрагасынын орун басары – Улуттук коопсуздук мамлекеттик комитетинин жетекчиси Камчыбек Ташиев чукул арада бул мекемени «Балдардын ден соолугун чыңдоо борборуна» айлантууну, заманбап шарттарды түзүүнү жана толугу менен жаңылоону тийиштүү жетекчилерге тапшырды. Алдыда мекеме жаңы жатакана, балдар ойноочу спорт аянтчалары, бассейн, чоңдор үчүн да ден соолукту чыңдоо комплекси ж.б. зарыл шарттар түзүлөт. Келээрки жылы жаңылоо иштери толук аяктап, анан гана пайдаланууга тапшырылат.

Алишер ТОКСОНБАЕВ, өз кабарчы