6 Бардыгы /

Бүгүн, 13-декабрь күнү, Жалал-Абад шаарынын Спутник кичи районундагы Т.Байзаков атындагы парктын аймагында жаңы курулган муниципалдык кинотеатр пайдаланууга берилди.

Жалал-Абад шаардык мэриясынын маалымат борбору билдиргендей, кинотеатрдын ачылуу аземине Жалал-Абад шаарынын мэри Эрнисбек Ормоков, Жалал-Абад шаардык депутаттар кеңешинин төрагасы Орозбек Турдубеков, шаардык кеңештин депутаттары “GALAXY CINEMA” компаниясынын жетекчиси Курманбек Бегалиев жана шаар тургундары катышты.

Шаар мэри Эрнисбек Ормоков өлкөбүздүн эгемендүүлүк тарыхында Жалал-Абад шаарында алгачкы ирет заманбап, көрүүчүлөргө бардык ыңгайлуу шарттары каралган муниципалдык кинотеатр курулгандыгын баса белгилеп, кинотеатр Мамлекеттик жеке өнөктөштүк мыйзамынын негизинде “GALAXY CINEMA” компаниясына ижарага берилгенин кошумчалады. Ошондой эле кинотеатрдын ишмердүүлүгү менен таанышып, ийгиликтерди каалады.

Иш-чара концерттик программа жана кызыктуу оюн-зооктор менен уланып, катышуучуларга белектер берилди.

Белгилей кетсек, кинотеатрдын курулушуна жергиликтүү жана республикалык бюджеттен 54 млн. сом жумшалган. Ал эми Мамлекеттик жеке өнөктөштүк мыйзамынын негизинде кинотеатрды ишке киргизген “GALAXY CINEMA” компаниясы 34 млн. сом инвестиция салган. Бул каражатка кино көрсөтүүгө керектүү техникалык каражаттар сатып алынып, көрүүчүлөргө ыңгайлуу шарттар түзүлгөн.