3 Бардыгы /

Төө-Моюн айыл өкмөтү – Араван районунун Ноокат районундагы анклавы. Ошондуктан, мындагы элдик жыйында өтө олуттуу проблемалар үстөккө-босток көтөрүлүп, буларды чекесинен токтоосуз түрдө жайгаруу талабы ачык коюлду.

 – Ноокат районун жана дагы Ош шаарын айланып өтүп, андан ары гана Араван районунун борборуна каттап, чарчадык, эй! Ошондуктан, Араван-Төө-Моюн кыска автоунаа ажолун тезинен асфальттап, пайдаланууга тапшырыңыздар? Ошондой эле кадр таңкыстыгынан бизде көзгө сүртөөр доктурубуз жок! Айла куругунда, коңшулаш Кызыл-Кыя шаарынын ооруканасына кайрылсак, алар бизди «Эсебиңер бизде эмес!» деп өгөйлөшөт. Мындан тышкары жыл сайын сугат сууга дагы өтө зарбыз! – деп биринен сала экинчиси зар какшашты Араван районундагы Төө-Моюн айыл өкмөтүнүн тургундары.

Баса, элдик жыйындын соңунда ротацияланып жаңыдан дайындалган Төө-Моюн айыл өкмөтүнүн башчысы Насридин Абдураимов ар айылды чекесинен кыдырып, муң-зарын тыңдап жаткандыгын айтып, опоңой кутулду. Ал эми Араван районунун акиминин биринчи орун басары Аскарбек Ахматов жаңы акимге жана премьер-министрге булардын даттануусун сөзсүз жеткирнээрин убадалап, жолго түштү…

Алишер ТОКСОНБАЕВ, өз кабарчы