15 Бардыгы /

Жалал-Абадда укук тартиби жана коопсуздук маселелери координациялык кеңешмеде талкууланды.

Жыйынга Кыргыз Республикасынын Президентинин Жалал-Абад облусундагы ыйгарым укуктуу өкүлүнүн биринчи орун басары Нурлан Эрматов, укук коргоо, күч түзүмдөрүнүн башчылары, райондук мамлекеттик администрация башчылары – акимдер, жергиликтүү өз алдынча башкаруу органдарынын жетекчилери катышты.

Кеңешмеде Жалал-Абад облусундагы мамлекеттик жана муниципалдык кызматкерлер арасындагы коррупциялык көрүнүштөр жана коррупцияга каршы күрɵшүүнүн абалы, диний экстремизм жана эл аралык терроризмге каршы күрөшүү аракеттери, жаш өспүрүмдөр арасындагы кылмыштуулуктун алдын алуу, кесепеттерин жоюу маселелери талкууланды.

Облус башчысынын биринчи орун басары Нурлан Эрматов Сузак, Базар-Коргон жана Ала-Бука районунун аймагындагы мамлекеттик жана муниципалдык кызматкерлер арасында коррупциялык көрүнүштөргө жол берүү фактылары басымдуу экенин айтты. Мында жетекчилердин жоопкерчилигин сынга алып, коррупцияга каршы мыйзам чаралары күчөтүлгөнүн эске салды.

Өткөн жылы Жалал-Абад облусунда 197 кызмат адамы тартиптик жоопкерчиликке тартылган болсо, мамлекеттик жана муниципалдык кызматтын кызыкчылыктарына каршы коррупциялык же башка кылмыштар боюнча жалпы 49 кылмыш иши козголгон.

Жыйындын жүрүшүндө жаш өспүрүмдөрдүн кылмыштуулугун алдын алуу маселелери орчундуу экени айтылып, укук коргоо органдары, жергиликтүү бийлик, үй-бүлө жана жалпы коомчулук арасында комплекстүү жумуш алып баруу тапшырмасы коюлду.