24 Бардыгы /

Ош облусуна караштуу Кара-Суу шаарындагы “Манас” стадионунун курулушу бир айдан кийин толук бойдон аяктап, андан ары биротоло пайдаланууга тапшырылат. Бул туурасында президенттин Ош облусундагы Өкүлчүлүгүнөн билдиришти.

Маалыматка караганда, мындан бир күн мурун Президенттин Ош облусундагы өкүлү Элчибек Жантаев жумушчу сапарынын алкагында Кара-Суу шаарындагы борбордук стадиондун курулуш иштери менен жеринде кенен-чонон таанышты. Анда ушул тапта эл аралык талаптарга жооп берген заманбап стадиондун курулушу 80 пайызга дейре аяктап, негизги конструкциялар жана футбол талаасы даяр болгону маалымдалды. Стадионду толук реконструкциядан өткөрүүнүн алгачкы этабында эски курулуштар алынып, гибриддик чөп төшөлүүчү оюн талаасы даярдалды. Эми көрүүчүлөр үчүн 5000 орундуу трибуна орнотулуп, андан ары үстү жабылат. Мындан тышкары, стадион түнкү жарыктандыруу, заманбап жуунучу жана кийим алмаштыруучу жайлар, чуркоо тилкеси менен дагы камсыз этилет. Облустун башчысы подрядчы жана жергиликтүү жетекчилерге долбоорго ылайык стадионду июль айынын аягына чейин толук ишке тапшырууну катуу  тапшырды.

Белгилей кетчүү жагдай: Кара-Суу шаарындагы “Манас”” стадионунун курулушуна жалпысынан 274 миллион сом каралган. Мынча каражат жергиликтүү бюджеттен, Ош облусунун өнүктүрүү фондунан жана Кыргыз футбол биримдиги тарабынан ажыратылган. Мындан тышкары Ош облус башчысы жумушчу сапарынын алкагында Кара-Суу шаарындагы таза суу жана саркынды суу чыгаруу системасынын курулушу менен дагы тыкыр таанышып, иштердин сапаттуу жана белгиленген мөөнөттө аякташын камсыздоо боюнча тиешелүү жетекчилерге катуу эскертти.

Алишер ТОКСОНБАЕВ, өз кабарчы