828 Бардыгы /

БАТКЕН. Кыргыз-Тажик делегацияларынын кеңири курамдагы жолугушуусу аяктады. Бул жөнүндө Президенттин Баткен облусундагы ыйгарым укуктуу өкүлү Абдыкарим Алимбаев ачыктады.

Абдыкарим Алимбаевдинайтымында, кеңири курамдагы жолугушуу дээрлик бир жарым саатка созулду. Саат 11:00дөн саат 12:30га чейин абдан катуу сүйлөшүүлөр жүрдү. Жалпысынан мурда өз ара сүйлөшүлгөн келишимдерди токтоосуз жүзөгө ашыруу жагы катуу айтылды. Маселен:

1) кошумча тартылган аскер күчтөрүн аймактан чыгаруу;

1) окуяны ар тараптуу жана өтө кылдат иликтөө;

3) эки өлкөнүн милиция кызматкерлеринин мындан ары биргелешип иш алып баруусу;

4) Тажикстандын Согдий облусунун жетекчиси менен элге түшүндүрүү иштерин такай жүргүзүү боюнча сүйлөшүлдү.

Ошондуктан, Президенттин Баткен облусундагы ыйгарым укуктуу өкүлү Абдыкарим Алимбаев эл арасында түшүндүрүү иштерин дароо эле баштады. Мына ошентип, Баткен облусунун Лейлек жана Баткен райондорунда абал соңку тапта турукташа баштады. Ошол себептүү айыл тургундары адатынча өздөрүнүн үйлөрүнө кайтышууда.

Өзгөчө кыдаалдар министрлигинен (ӨКМден) билдиришкендей, жакындарынын үйлөрүнө өз алдынча эвакуацияланган 17 799 жарандын ичинен 8687 адам туруктуу жашаган ордуларына кайтышты. Ал эми ӨКМ тарабынан убактылуу жайга жайгаштырылган Лейлек районунун 554 жараны толугу менен жана Баткен районунда 33 жаран үйлөрүнө кетишти.

Эскерте кетчү жагдай: Баткен жергесиндеги чек ара чатагы абдан курчуган айылдардан жалпысынан 18 507 жаран ыкчам эвакуацияланып (көчүрүлүп), булардын арасынан тууган-туушкандарынын үйлөрүнө өз алдынча жайгашканы 17 799 жаран (3398 үй-бүлө), ал эми убактылуу жайларга жайланышкан тургундардын саны 708 жаранды түзгөн.

Алишер ТОКСОНБАЕВ, өз кабарчы