1,503 Бардыгы /

ОРУСИЯ. Бул жөнүндө Москвадагы Кадамжай коомунун өкүлдөрү редакциябызга билдиришти. Алар ырасташынча, кырсыкта каза тапкандардын арасында аталган райондун дагы бир тургуну бар.

Айрым маалыматтарга караганда, Баткен облусуна караштуу Кадамжай районундагы Марказ айылынан болгон маркум жубайлардын артында үч баласы жетим калды. Буга дейре каргашада мертинген жарандардын төртөө Жалал-Абад облусунан экендиги тастыкталган. Президент Садыр Жапаров Орусиянын Ульяновск облусунда 21-августта 14 кыргыз жараны мерт болуп, дагы үчөө жараат алган окуяга байланыштуу Кайрылуу жасады. Анда 23-августту Кыргызстандын аймагында аза күтүү күнү деп жарыялаганын шардана кылган.

Маалыматтарга караганда, аварияга учураган кичи автобустагы кыргызстандыктар “кирди-чыкты” талабынан улам Орус-Казак чек арасына келип, кайра кайтып баратышкан. Ушул тапта ооруканада жаткан Кыргыз жарандарынын абалы дагыле оор. А мерт болгондордун жакындары үчүн Орусиядагы Кыргыз Элчилигинин (+7 926 861 50 98, +996 551 312-000) атайын телефондору күнү-түнү иштеп жаткан чагы. Соңку кезде Орусиядагы мигранттарга каттоо талабынын күчөгөндүгүнө, анан дагы Орусиядагы Кыргыз элчилигинин ишине байланыштуу сын-доомат көп айтылып жаткан эле.

Алишер ТОКСОНБАЕВ, өз кабарчы