1,413 Бардыгы /

Казакстан 2023-жылдын август айынын аягына чейин аскердик продукциялардын экспортун токтотот. Тиешелүү чечим 27-августта өлкөнүн Коргонуу өнөр жайы боюнча комиссиясынын жыйынында кабыл алынды.

Курал-жаракты чет өлкөлөргө сатууну убактылуу токтотууну Индустрия жана инфраструктуралык өнүгүү министрлиги сунуштаган. Азырынча экспортту бир жылга токтото туруунун себептери так айтыла элек.

СССР тарагандан кийин Казакстан коргонуу өнөр жайындагы ондогон ишкананы мурастап калган. Алар негизинен Аскер-деңиз күчтөрүн куралдантуу үчүн, танктарды, атуучу куралдарды, ракеталык системаларды жана абадан коргонуу системаларын жабдуучу каражаттарды чыгарууга адистешкен.

Жергиликтүү ЖМКлар мартта өлкөдө 300 чакырымга чейинки аралыкка жапырт аткылоочу реактивдүү системалар, ракеталык комплекстер чыгарылып жатканын, заводдор Израилдин технологиясы менен иштеп жатканын маалымдаган.

Аз күн мурун казакстандык журналисттер президент Касым-Жомарт Токаев Алматыда бомбадан баш калка кылуучу жайларды курууга тапшырма бергенин жазып чыгышкан. Шаардын администрациясы калкалоочу жайлар геосаясий кырдаалдан улам гана эмес, калаа сейсмикалык зонада жайгашканы менен деп түшүндүрүшкөн.

Курал-жарак экспортун токтотуу жана бомбадан калкалануучу жайларды текшерүү тууралуу кабарлар Орусиянын Украинанын аймагына кол салуусу уланып жаткан маалга туш келди. Орусиянын өнөктөшү болуп саналган Казакстан Москванын аракеттерин расмий түрдө айыптаган эмес жана нейтралитет позициясын карманып келет. Ошол эле учурда президент Касым-Жомарт Токаев орус президентинин катышуусунда өткөн Санкт-Петербургдагы экономикалык форумда Казакстан Донбасстагы өзүн-өзү жарыялаган республикаларды тааныбай турганын айткан. Токаев аларды “квазимамлекеттер” деп атаган.

WWW.