1,299 Бардыгы /

ЖАЛАЛ-АБАД. Ноокенде дайынсыз болуп жаткан өспүрүм кыздар табылып, милиция айдоочуларга кайрылды

Жалал-Абад ОИИБдин басма сөз кызматы маалымдагандай, 2023-жылдын 24-январь күнү саат 12:45 чамасында Ноокен районунда 6-класста окуган 2010-ж.т. классташ 2 кыз мектепке барабыз деп үйүнөн чыгып кеткен бойдон дайынсыз жоголгон. Бул окуя Ноокен милициясы тарабынан каттоого алынып, кыздарды издөө иштери башталган.

ИИМдин кылмыш иликтөө башкы башкармалыгынын жана Ноокен РИИБдин кызматкерлери тарабынан жүргүзүлгөн издөө иштеринин натыйжасында дайынсыз болуп жаткан кыздар Бишкек шаарынан табылган. Үйлөрүнөн кетүүсүнүн себеби жакындарына болгон таарыныч катары көрсөтүшкөн. Алар Ноокен районуна алынып келинип ата-энесине өткөрүлүп берилген. Өз кезегинде кыздардын жакындары милицияга ыраазычылык билдиришкен. Дайынсыз болуп жаткан кыздарды Бишкекке алып кеткен айдоочу Ноокен РИИБне чакыртылып, түшүндүрүү иштери жүргүзүлгөн.

Бул окуяга байланыштуу милиция айдоочуларга жашы жете элек өспүрүмдөрдү чоң адамдардын коштоосу жок алыскы аймактарга ташыбоого чакырат. Жаш балдардын себепсиз көчөдө жүргөнүн көрсөңүз жана кандайдыр бир күмөндүү ойлор жаралса жакынкы милиция бөлүмдөрүнө кайрылыңыздар.