1,161 Бардыгы /

Кыргызстандын тарыхында эзели мындай факты катталган эмес! Жалал-Абад облусуна караштуу Майлуу-Суу шаарынын прокуратурасы Майлуу-Суу шаардык ички иштер бөлүмүнүн тергөөчүсүнүн жана дагы бул калаадагы Кызыл-Жар психиатриялык ооруканасынын жетекчилигинин үстүнөн кылмыш ишин козгоду.

          Жалал-Абадда жайгашкан «Справедливость» укук коргоо уюмунун маалыматына караганда, Майлуу-Суу шаарынын 34 жаштагы тургунун – төрт балалуу келинди Майлуу-Суу шаардык ички иштер бөлүмүнүн тергөөчүсү жүйөөсүз гана камаган. Ошол себептүү тергөөчүнүн үстүнөн Кылмыш кодексинин «Кызматынан кыянат пайдаланган», ошондой эле «Психиатриялык стационарга мыйзамсыз жаткырган» деген беренелерине ылайык кылмыш иши козголду.

          Баса, жаны кашайган 43 жаштагы келинди Майлуу-Суу лампа заводунун жаңы жылдык балатысын өрттөөгө аракет кылганда гана кармашкан. Мунун себебин андан тыкыр сураштырганда, келин буга дейре  Майлуу-Суу шаарындагы башкы балатаны дагы өрттөгөндүгүн ачык эле моюндаган. «Справедливость» бейөкмөт уюмунун маалыматына караганда, майлуу-суулук келин төрт баланы өзү жалгыз багат. Балдары жаңы жылда апасынан кадимкидей белек-бечкек суранышкан. Тилекке каршы, апасы каржылык туңгуюукка кептелгендиктен, алардын өтүнүчүн таптакыр аткара алган эмес! Айласы таптакыр куруганда, келин чүрпөлөрүнө «Жаңы жыл мусулмандардын майрамы эмес!» деп дагы түшүндүргөн. Андан ары эмоцияга азгырылып, мунун кесепетинен таптатынакай балатыны өрттөп таштаган.

          Бирок, Майлуу-Суу шаарындагы жаңы жылдык балатыны өрттөө фактысы Кылмыш кодексинин «Бирөөлөрдүн мүлкүнө зыян келтирүү, же жок кылуу, өрттөө аркылуу чыгымга учуратуу» беренесине ылайык гана Жоруктар реестрине катталган. Ал эми ушул жылдын 20-январында майлуу-суулук келинди а түгүл Ош облустук психиатрия жана наркология борборуна дагы алпарып көрсөтүшкөн. Тилекке каршы, бул жерде деле келиндин писихикалык жактан оорулуу же таптаза экендигин так аныктай алышкан эмес!

          Бирок, ошого карабастан, Майлуу-Суу шаардык ички иштер бөлүмүнүн тергөөчүсү төрт балалуу келинди Кызыл-Жар психиатриялык ооруканасына мажбурлап жаткырган. Ал эми анын төрт баласын Жалал-Абад шаарындагы «Ак-Жол» реабилитациялоо борборуна жөнөтүп ийген.

          Алишер ТОКСОНБАЕВ, өз кабарчы