435 Бардыгы /

Ош шаардык ички иштер башкармалыгынын басма сөз кызматы 2010-жылкы Июнь коогалаңында адам өлтүрүүгө шек саналып 14 жылдан бери эл аралык издөөдө жүргөн адам акыры кармалгандыгын шардана кылды.

Маалыматка караганда, шектүү жаран ушул жылдын 26-апрелинде Орусиядан учуп келген учурда Ош аэропортунан дароо колго түшүрүлдү. Милиция шектүү Орусиянын ар кайсы шаарларында жашаган жерин өзгөртүп, улам изин жашырып жүргөндүгүн дагы кошумчалады. Ага «2010-жылы 13-июнда Ош облусунун Кара-Суу районунун 57 жаштагы тургунун башка да адамдар менен чогуу кармап, Ак-Буура дарыясынын жээгине алып барып өлтүргөн» деген айып тагылууда. Маркумдун сөөгү 2010-жылдын 19-июнунда Өзбекстандын Анжиян облусунун Ходжабад районунун аймагынан араң табылган. Ош шаарлык милициясынын убактылуу кармоочу жайына киргизилди.

Баса, 2010-жылдын июнь айында Ош жана Жалал-Абад облустарында улут аралык жаңжал тутанган. Июнь коогалаңы деген ат менен калган бул тополдоңдо расмий эсеп боюнча 446 адам набыт таап, 2 миңге чукул киши ар кандай жараат алышкан. Дагы 57 адам дайынсыз жоголуп, алардын 19у эмдигиче табыла элек.

Алишер  ТОКСОНБАЕВ, өз кабарчы