33 Бардыгы /

Соңку сааттарда Кыргызстандын Түштүк башкалаасында үй тибиндеги эки бала бакча ачылып, дароо ишке киришти. Бул туурасында муниципалитеттен билдиришти.

Маалыматка караганда, Ош шаарындагы “Сулайман-Тоо” жана “Курманжан датка” муниципалдык аймактык башкармалыктарында аталган Программанын алкагында Ага-Хан фондунун “WE CARE: Аялдардын туруктуу ишмердүүлүгүнө шарт түзүү” долбоорунун көмөгү аркасында “Жетиген” жана “Жаннат” аталыштарында үй тибиндеги бала бакчалар ачылды.

Бала бакчалардын ачылыш аземине Ош шаар мэринин орун басары Нурбек Кадыров катышып, мектепке чейинки билим берүү балдардын билиминин негизи болуп эсептелээрин, аталган Программанын алкагында ачылган үй тибиндеги бала бакчалардын бул багытта чоң жардам берилээрин ачык билдирди.

Анткени, Ош шаарында үй тибиндеги бала бакчалардын жеңилдетилген шартта ачуу боюнча эл арасында калкка кеңири түшүндүрүү иштерин жүргүзгөн атайын жумушчу топ ырааттуу иш алып барууда.

Баса, “Өкмөттүк акселераторлор” Программасынын алкагындагы бул долбоордун негизги максаты – өлкөдөгү чакан бизнести колдоо жана үй-бүлөлөргө үйүндө, же батиринде үй тибиндеги бала бакча уюштурууга жардам берүү, документтерди алууну жөнөкөйлөштүрүү.

Ошентип, Ош шаарында бала бакчалардын жетишсиздигинен арылуу жана “Өкмөттүк акселераторлор” Программасын ырааттуу жүзөгө ашыруу максатында мектепке чейинки билим берүү системасын өнүктүрүү үчүн үй тибиндеги бала бакчаларды ачуу боюнча иштер мындан ары дагы ырааттуу улантылмакчы.

Алишер ТОКСОНБАЕВ өз кабарчы