66 Бардыгы /

Ютубдагы «За правду» баракчасынын ээси Азамат Карабаевдин камактагы мөөнөтү ушул жылдын 19-декабрына дейре  узартылды. Бул туурасында Ош облустук сотунун маалымат кызматынан билдиришти.

Маалыматка караганда, ушул жылдын 21-ноябрында Азамат Карабаевдин камактагы бөгөт чарасы Ноокат райондук сотунда каралып, тергөөчүнүн камакка алуу өтүнүчү канааттандырылган. Анткени, Ош облустук милициясы Азамат Карабаевге Кылмыш-Жаза Кодексинин 41-беренесинин экинчи бөлүгү («Кылмышка кошо катышуучулардын түрлөрү») жана 278-беренесинин («Массалык башаламандыктар») беренеси менен кылмыш иши козголуп, кармалган. Милиция анын Ютубдагы баракчасына жарыяланган видео-материалга жүргүзүлгөн соттук-лингвистикалык экспертизанын корутундусуна ылайык кылмыш иши козголгондугун, ал тасмада Ноокат районунун Төрөбай Кулатов атындагы айылнын тургундары бирге 5-июлда ЮКЦга  (Түштүк-Кыргыз цемент зазводуна) барышып бейбаштык кылышкандыгын билдирген.

Баса, «За правду» баракчасынын ээси – ютубер Азамат Карабаев үстүбүздөгү жылдын 22-октябынрда Ноокаттагы жаңы салынган жолдун сапатына нааразылыгын билдирип, Фейсбукка видео жарыялаган.  Ошол эле күнү кечинде милиция аны кармап кеткен. Айрым интернет басылмалар блогердин кармалышын ошол соңку материалына тыгыз байланыштырган. Кыргызстанда блогерлер социалдык тармакка жазган пикири, же бөлүшкөн маалыматы үчүн абакка кесилип, пробация же айып пул менен чыккан бир нече учур катталды.

Алишер ТОКСОНБАЕВ, өз кабарчы