15 Бардыгы /

Ветеринардык жана фитосанитардык көзөмөл кызматынын Ош шаары жана Ош областы боюнча регионалдык башкармалыгынын башчысы жана башкы инспектору соода түйүндөрүн негизсиз текшеришип, ишкерлерден акча каражаттарын талап кылышкан.

КРдин Башкы прокуратурасынын маалымат кызматы билдиргендей, Ош областынын Араван районунун прокуратурасы тарабынан жүргүзүлгөн текшерүүдө, Ветеринардык жана фитосанитардык көзөмөл кызматынын Ош шаары жана Ош областы боюнча регионалдык башкармалыгынын башчысы С.Э. жана башкы инспектору М.К. 2025-жылдын 4-октябрында текшерүүгө уруксат кагаздары жок Араван районундагы соода түйүндөрүн жана эт сатуу жайларын негизсиз текшеришип, «мыйзам бузуу аныкталды» деген шылтоо менен ишкерлерден акча каражаттарын талап кылышкандыктары аныкталган.

Бул фактылар боюнча Араван райондук прокуратурасы тарабынан Кылмыш-жаза кодексинин 337-беренеси (кызмат абалынан кыянаттык менен пайдалануу) боюнча кылмыш иши козголуп, учурда тергөө амалдары жүргүзүлүүдө.