2,721 Бардыгы /

   Мурда ден соолугунан мүмкүнчүлүгү чектелгендерге гана мамлекет ай сайын пособие төлөчү. Жаңы жылдан тартып аларды үзгүлтүксүз караган апасына, же атасына дагы Өкмөт тарабынан пособие сөзсүз түрдө чектелет. Бул жөнүндө Кара-Суу райондор аралык медициналык-социалдык эксперттик комиссиянын төрагасы Каныбек МУРАТОВ кабарчыбызга курган маегинде ачыктады.

– Каныбек мырза, Сиз жетектеген Кара-Суу райондор аралык медициналык-социалдык эксперттик комиссия негизинен кайсыл аймактарды тейлейсиздер?

– Биздин комиссиянын алкагы өтө эле кеңири. Кара-Суу, анан дагы тээ эң алыскы Алай жана Чоң-Алай райондорунун тургундарын кошо тейлейбиз. Комиссиянын курамы Алай районуна ай сайын, ал эми Чоң-Алай районуна жылына бир ирет атайын барып, жогорудагы категориядагы жарандарыбыздын саламатчылыгын жеринде дыкаат текшерип, анан гана аларга корутунду жазып беребиз.

– Айрыкча тоолуу райондорду байырлагандарда заманыбызга жараша дарттардын түрү деле көбөйгөндүр?

– Ооба. Жалпыга маалым, башка аймактарга караганда, Алай жана Чоң-Алай райондорунун климаты абдан эле катаал. Жергиликтүү тургундар айрыкча кышындасы адам эмес ит деле чыдбаган шарттарда дагыле жансакташат. Быйыл жыл башынан тартып биз тейлеген аймактарда дагы 300 чакты мүмкүнчүлүгү чектелген кишилерди аныктадык. Албетте, өтө өкүнүчтүү!

– Деги соңку тапта социалдык оорулардын кайсыл түрү абдан эле арбыды?

– Жүрөк жана кан тамыр дартына чалдыккандар улам арбып баратат. Жогоруда айтпадымбы, биз тейлеген аймактарда жарандарыбыз киши чыдагыс шарттарда дагыле жашап келатышат. Ошого жараша өздөрүнүн саламатчылыгына дагыле эч кам көрүшпөйт. Анан дагы оокаттануу режимин дагы таптакыр сакташпайт. Ошентип, мунун азабын моминтип эле өздөрү тартып жатышпайбы.

– Каныбек мырза, жаңы жылдан тартып ден соолугунан мүмкүнчүлүгү чектелген балдарды караган апасы, же атасы дагы эми пособие алышат турбайбы?

– Ооба. Өткөн жылдын 23-ноябрында Кыргыз Өкмөтүнүн №553-токтому жарык көрбөдүбү. Буга ылайык ден соолугунан мүмкүнчүлүгү чектелген балдарды туруктуу караган апасына, же атасына дагы эми мамлекет кадимкидей эле пособие төлөнөт.  

Албетте, муну үчүн корутундуну жана сунушту биз гана беребиз. А кимисине пособие (жөлөк пул) чектөөнү жана төлөөнү аймактардагы социалдык жактан коргоо кызматтары гана аныкташат.

Алшер ТОКСОНБАЕВ, өз кабарчы