2,783 Бардыгы /

Бүгүн, 4-мартта 1-кесиптик лицейде кургак учуктун алдын алуу боюнча студенттерге маалыматтар берилди.

Ага үй-бүлөлүк дарыгерлер борборунун кызматкерлери жана Кызыл-Ай коомунун өкүлдөрү келди. Кургак учуктун жугуу жана алдын алуу жолдорун кенен түшүндүрүп беришти.

Бул оорунун алдын алуу керектигин жана өлкөдө туруктуу формадагы оорулар көбөйүп жатканы жөнүндө Жалал-Абад шаардык  алдын алуу жана мамлекеттик сан эпидемиология көзөмөл борборунун эпид борборунун башчысы Парикан Эшенкулова өз сөзүндө:

“Кургак учуктун алдын алуу жана күрөшүү боюнча бир айлык кабыл алынган. Анын негизинде студенттер арасында окутуу болуп жатат. Деги эле областта, республикада актуалдуу оорулардын катарына кирет. Себеби дегенде оору катталган жалпы саны боюнча  азайганы менен түрлөрү көбөйүүдө. Жаштар арасында бул инфекция тууралуу маалымат берүү жана жайылып кетүүсүнүн алдын алуу, өз убагында кайрылуу жана сапатуу медициналык жардам алуу максатында ушул лекциялар өткөрүлүп жатат“- деди.

Студенттерге бул маалыматтар пайдалуу болгонун айтып жатышты.

“Кургак учук боюнча кенен маалыматтар берилди. Өзүмө керектүү суроолорума жооп ала алдым. Алдын алуу үчүн иммундук системаны бекемдөө жана жакшыртуу керек. Бул оорудан айыгып кетүүгө болот”- дейт Токтоайым Турдумаматова, студент.

“Өтүлгөн лекция бизге жакшы таасир калтырды. Мен буга чейин мындай  лекцияларга катышып көргөн эмес элем. Кургак учук боюнча пайдалуу маалыматтарды алдым”- деди Сылыкбек Базаралы уулу, студент.

Лекциянын жүрүшүндө студенттерге видеороликтер көрсөтүлдү. Аларга маалымат жетиштүү болуусу үчүн алдын алуу баракчалары таратылды.

Акылай КАРАБАЕВА, “Аймак”