1,854 Бардыгы /

Тажикстанда тыюу салынган ислам партиясынын өмүр бою эркинен ажыратылган жетекчилеринин бири Махмадали Хаит кыйноолорго кабылууда. Бул тууралуу оппозициячы менен тергөө абагында жолугуп чыккан жубайы Савринисо Жураева билдирди.

Анын айтымында, абактын жетекчилиги анын телеканалдар аркылуу Ислам кайра жаралуу партиясын айыптап сүйлөп берүүсүн талап кылууда.

«Күйөөм тергөө абагынын жетекчилиги анын телеканалдардан Ислам кайра жаралуу партиясын айыптап сүйлөп берүүсүн талап кылып жатканын айтты. Мунун баары кыйноолор жана уруп-согуулар менен коштолуп жатыптыр», — деди Жураева.

Анын айтымында, күйөөсү абактагы шарттарга даттанып, анын Башкы прокуратурага, Жазаларды аткаруу кызматына жана эл аралык укук коргоо уюмдарына даттануусун өтүнгөн. «Ал эгер жарым жылдан кийин өлүп калса, буга кыйноолор менен начар шарттар себеп болгон болот деди», — деп билдирди аялы.

Бирок өлкөнүн Жазаларды аткаруу кызматы оппозициячынын кыйноого алынып жаткандыгы тууралуу маалыматты четке какты. Мекеме башчысы Мансуржон Умаров январда Хаит менен жолукканын билдирди. «Эч нерсеге даттанган эмес. Эгер туугандарында маалыматтар болсо, алар Башкы прокуратурага кайрыла алышат», — деди ал.

Махмадали Хаит 2016-жылы июнда өлкөнүн Жогорку соту тарабынан өмүр бою эркинен ажыратылган. Ал Тажикстандын коргоо министринин мурдагы орун басары Абдулхалим Назарзоданын аскердик козголоң жасоо аракетине тиешеси бар деп айыпталууда. Бул иштин алкагында Ислам кайра жаралуу партиясынын дээрлик бардык жетекчилери камакка алынып, партиянын өзү террордук деп табылып, анын ишмердүүлүгүнө өлкө аймагында тыюу салынган.

Былтыр жазында БУУнун негизсиз кармоолор боюнча жумушчу тобу Душанбеден 60 жаштагы Махмадали Хаитти тез арада бошотууну талап кылган. Анда Хаиттин кармалышы жана ага карата чыккан сот өкүмү эл аралык укуктарды буза турганы белгиленген.

www.