ЖАЛАЛ-АБАДДА ЭКИ КҮНДӨ 30 ДАН АШЫК АДАМГА ЭКИ МИҢ ДОЛЛАРЛЫК ОПЕРАЦИЯ ЖАСАЛДЫ

1,433 Бардыгы /

Чет элдик врачтар жүрөккө акысыз операция жасаганы келишти.

9-апрель күнү Түштүк аймактык жүрөк кан тамыр хирургия илимий борборуна Бириккен Араб эмираттарынан эки профессор жүрөк кан тамыр ооруларына акысыз операция жасоо үчүн келди. 3 күнгө созулган иш сапарында алар болушунча кобүрөөк бейтапка операция жасоого аракет кылып жатышканын билдирди аталган борбордун директору Калдарбек Абдыраманов.

–Мен Бишкекте иштеп жүргөндө Араб Эмиратынын врачтары менен иштешип, алар Кыргызстанга акысыз операция жасоого келишкен эле. Эки жылдан бери мамлекет тарабынан жеңилдик болбой жаткандыгынан, быйыл өзүбүз сүйлөшүп чакырдык. Жалал-Абад областына биринчи келип жатышат. Антпесе мындай операция кымбат болгондуктан, көпчүлүктүн каражаты жетпейт.

Кан тамыр кысылып, жүрөккө кан келбей калат, мындайда кан тамырдын жолун ачуу үчүн стенд коюлат. Мындай стенд өлкөдө жок, бирок фирмалар менен сүйлөшүп чет жактан сатып алуу баасы 1 миң 800 долларга жетет. Кем карчы муну менен гана бүтүп калбайт, операцияга жалпы эки миң доллар чыгым сарпталат. Бул ирет чет элдик врачтар өздөрү менен 60 стенд алып келишкен, алардын баары акысыз коюлат. Эки күндө 30 бейтапты кабыл алууга жетишкен.

Бейтап Калил Токтобаев Бишкектен Жалал-Абадка келгенде оорусу кармап калып, чет элдик кардиологдордун акысыз операциясы сактап калды. Ал буга чейин баасы эки миң сомго жеткен дары дармектерди сатып алып, аны күнүгө бирден ичип туруусу керек эле, операциядан кийин 6 айдан соң ал дарылардан кутулат, башкача айтканда эми дарысыз жашай алат.

Жалал-Абаддагы Түштүк аймактык жүрөк кан тамыр хирургия илимий борборуна жылына 500 дөй адам кайрылат. Андан сырткары бир коюлган стенд 15 жылда кайра жаңыланышы керек болот. Андыктан карапйым элдер өкмөт тарабынан эки жылдан бери токтоп калган акысыз операцияга муктаж.

-Биздин ооруканада жүрөк ооруларынын бардык түрүнө операция жасалат. Болгону ушул ооруда бейтаптар чет өлкөдөн стенд сатып алууда кыйналышат” – дейт К.Абдыраманов.

Белгилей кетсек, аталган иш чара Түштүк аймактык жүрөк кан тамыр хирургия илимий борбору тарабынан Кыргызстанда жана Орто Азияда биринчи жолу жүрөккө жасалган операцияга 60 жыл толгондугуна карата уюштурулган. Мындан 60 жыл мурда 19-майда өлкөдө кардиохирургиянын жаңы эрасы башталган.