2,447 Бардыгы /

Жалал-Абад шаарында Чернобыль апаатынын 33 жылдыгын белгилөө салтанаты Улуу Ата Мекендик согушта курман болгондордун жаркын элесине арнап тургузулган эстеликке гулчамбар коюу менен коштолду. Анткени шаарда апааттын курмандыктарына коюлган эстелик жок. Бир нече жылдардан бери эстелик маселесин жергиликтүү бийликке коюшат, бирок майнап чыга элек. Салтанат учурунда сөз сүйлөгөн катышуучу, ардагер жергиликтүү бийликке алгач колдоолорго рахмат айтып, эми күн санап катары суюлуп бараткан Чернобылчылардын эстелик маселесин да чечип берүүсүн өтүндү.

“Жеңиш” эс алуу багында Уулу Ата Мекендик, Ооган, Баткен согуштарынын катышууларына арналган эстеликтер катары менен жайгашкан. Алардын катарына Чернобыль апаатынын катышуучулары үчүн да жер ажыратылып, азырынча бош турат. Ал эми шаардык бийликке өткөн жылы сметасы 2 миллионго барабар сунуш түшкөн. Азырынча жай ажыратылып эми, каражат маселеси каралып жатканын билдирди социалдык иштер боюнча вице-мэр Руслан Алтымышов.

Жалал-Абад шаарынын Жеңиш эс алуу багында жыл сайын эле 26-апрель күнү Чернобыль апаатынын курмандыктарын эскерүү күнү белгиленет. Быйыл шаар тургундары, курман болгон катышуучулардын жакындары жана жергиликтүү бийлик өкүлдөрү катышты. Каза болгондордун жаркын элесине арналып куран окулуп, мүнөттүк эскерүү жарыяланып, асманга ок атылды.

Эске сала кетсек, Жалал-Абад шаарында 120 Чернобыль апаатынын катышуучусу болгон, учурда алардын 23ү калып, баарысы II-III –топтогу майыптар. Социалдык жөлөк пул катары ай сайынкы 7 миң сом, балдарына миң сом каралган.

Роза АКМАТЖАН кызы, “Аймак”