1,441 Бардыгы /

Белгилүү америкалык ишкер жана финансист, мультимиллиардер Питер Тиль ФБР жана ЦРУга кайрылып, Google компаниясын текшерүүнү талап кылды. Ал издөө системасын кытай тыңчылары аралап кеткен болушу ыктымал деп эсептейт.

Тиль жекшембиде Вашингтондогу консерваторлор конференциясында сөз сүйлөдү. Ал – “Фейсбуктун” директорлор кеңешинин мүчөсү жана PayPal онлайн төлөм системасынын негиздөөчүлөрүнүн бири.

“Атайын кызматтардын өкүлдөрү Google компаниясына үч суроо берсе болот. Биринчи: компаниянын жасалма интеллект менен алектенген Нью-Йорктогу филиалдарында канча чет элдик тыңчы иштейт? Маанилүүлүгү боюнча бул долбоор 40-жылдары атом бомбасын түзүү үчүн түзүлгөн Манхэттен долбооруна барабар. Экинчи суроо: Google топ-менежменти баштан-аяк кытай агенттери менен курчалганбы? Үчүнчүсү: ушул себептерге байланыштуу Google кытай аскерлери менен саткынчылык келишимине кол коюп, америкалык армия менен кызматташуудан баш тарттыбы?”, – деди Тиль.

Google Питер Тилдин айткандарына комментарий берүүгө ашыга элек.

Былтыр чет элдик басылмалар көп жылдар мурун кытай рыногунан кеткен Google компаниясы издөө кызматынын модификацияланган версиясын жашыруун түрдө иштеп чыгып, ири рынокко кайра кайтууга ниеттенип жатканын жазышкан. Dragonfly (“Ийнелик“) деп аталган бул долбоор дүйнөлүк коомчулук арасында жана компаниянын өзүндө кескин сынга алынып, декабрда жабылганы кабарланган.

Буга чейин Google учкучсуз учактар тарабынан алынган маалыматтарды анализдөөгө багытталган жасалма интеллект программаларын иштеп чыгуу боюнча Пентагон менен болгон келишимин узартпай койгон.

Кытай менен АКШ акыркы мезгилде Huawei корпорациясынын иши боюнча талашып-тартышып келет. Кошмо Штаттар америкалык компанияларга Huawei менен иштөөгө тыюу салган. Вашингтон бул чечимин маалымат коопсуздугун сактоо менен түшүндүргөн.

www.