565 Бардыгы /

24-июлда Казакстандын Семей шаардык соту «Казатомпром» корпорациясынын мурдагы башчысы Мухтар Жакишевди мөөнөтүнөн мурда шарттуу бошотуу өтүнүчүн канааттандырган жок.

Жарандардын көбү, анын ичинде айрым бийликчил адамдар дагы сот Жакишевди мөөнөтүнөн мурда бошотот деп болжомолдоп жатышкан. Сотто сүйлөгөн адвокат Нурлан Бейсекеев убактылуу кармоочу жай менен абакта Жакишевдин саламаттыгы кыйла начарлаганын билдирди.

Семей шаардык соту 2018-жылы дагы Жакишевди мөөнөтүнөн мурда шарттуу бошотуу тууралуу өтүнүчтү четке каккан.

Мухтар Жакишев Казакстандын баш калаасында 2009-жылы май айында кармалып, коррупция айыбы менен 14 жылга соттолгон. Ал саясий ишмердүүлүк менен алектенбегенине карабастан, 2013-жылы айрым жергиликтүү укук коргоо уюмдары тарабынан саясий туткун деп таанылган. Алар Жакишев Казакстандын биринчи президенти Нурсултан Назарбаевдин эң башкы саясий душманы, бозгундагы саясатчы Мухтар Аблязов менен дос болгону үчүн гана камалганын айтып келишет.

2015-жылы БУУнун адам укуктары боюнча комитети Жакишевдин даттануусунун негизинде анын укуктары бузулуп жатканын билдирип, казак бийлигин аны абактан бошотууга чакырган.

Расмий Астана Мухтар Жакишевдин ишинде саясий боёк жок экенин билдирип келет.

www.