573 Бардыгы /

29-июлда америкалык таасирдүү мыйзам чыгаруучулар АКШ президенти Дональд Трампты орусиялык мурдагы чалгын кызматкери Сергей Скирпаль жана анын кызынын ууландырылышына байланыштуу Москвага санкция киргизүүгө чакырышты.

Дүйшөмбү күнү Өкүлдөр палатасынын эл аралык иштер комитетинин башчысы Эллиот Энгел жана республикачыл Майк Макколдун Трампка жөнөткөн катында 1991-жылы кабыл алынган “химиялык жана биологиялык куралдарды көзөмөлдөө жана жок кылуу” жөнүндөгү мыйзамга ылайык, санкциялардын экинчи толкуну биринчисинен үч ай өткөн соң киргизилиши керек болчу. Катта санкция киргизилгенден бери бир жылга чукул убакыт өткөнү айтылат.

Скрипалдын ууландырылышына байланыштуу Кошмо Штаттар Кремлге каршы 2018-жылы августта санкция киргизген. Бул чектөөнүн алкагында 60 орусиялык дипломат өлкөдөн чыгарылып, Орусиянын Сан-Францискодогу консулдугу жабылган. Кремль 90 күндүн ичинде химиялык курал колдонбой турганын далилдеши керек болчу. Антпесе мыйзам боюнча Орусиянын каржы системасына жана дипломатиялык мамилелерге олуттуу зыян алып келе турган каттаал санкцияларды киргизүү каралган. Бирок Москва жооп берген эмес.

2018-жылы 4-мартта Британиянын Солсбери шаарында мурдагы орус тыңчысы Сергей Скрипаль кызы Юлия экөө ууландырылган. Лондон алар СССРде жасалган ”Новичок” тобундагы затка ууландырылганын аныктап, буга орус бийлигин айыптап чыккан. Кремль бул боюнча дооматтарды четке кагып жүрөт. Улуу Британия менен катар Евробиримдикке мүчө башка өлкөлөр дагы Москвага каршы санкция киргизишкен.

www.