3,509 Бардыгы /

Жалал-Абад областында жумушсуздук күч алды, статистика боюнча бир бош иш орунуна 1592 адам туура келүүдө. Мындай маалымат Өкмөттүн Жалал-Абад областындагы өкулчүлүгүнүн жарым жылдыкты жыйыныктоочу коллегиясында белгилүү болду.

Отчётто жазылган маалыматтарга караганда үстүбүздөгү жылдын 1-июлуна карата област боюнча жумуш издеп кезекте турган эмгекке жарамдуу, жумушсуз калктын саны, иш менен камсыздандыруу борборлорунда 33 миң 451 адамды түздү. Мындан 27 миң 544 адамда официалдуу жумушсуз статусу бар.

Тилекке каршы ушул эле мезгилге карата бош жумушчу орундун саны 21 ди гана түзгөн. Бул деген бир бош иш орунуна 1 миң 592 адам туура келерин аныктайт.

Официалдуу түрдө катталган жумушсуздардын жалпы санынын ичинен 173 адам   кесиптик  окуудан  өтүшкөн.  Ал  эми  243 адам коомдук акы төлөөнүүчү иштерге тартылган.

Ал эми Жалал-Абад шаардык калкты жумуш менен камсыз кылуу бөлүмүнүн кызматкерлери, област борбору болгон шаар аймагында төмөнкү кесиптерде ишчилердин жоктугу актуалдуу болуп жаткандыгын билдиришти.

1. Тажрыйбалуу тигүүчүлөр
2. Автослесарлар
3. Ашпозчулар (көбүнчө эвропа тамактарын жасоочу ашканаларга) Жалал-Абадда ашпозчулук кесипти атайын окуудан өтүшпөй өз алдынча үйрөнгөндөр көп, ошондуктан эвропа ашканаларын өздөштүргөндөр өтө аз.
4. Официант жана бармендер. Кыргызстанда бармендерди даярдоочу окуу же атайын бир курстар жок болгондуктан тажрыйбалуу бармендерге талап күч.
5. Орус тилдүү мугалимдер. Айрыкча башталгыч класстардын мугалимдери жана бардык предметтер боюнча эле орус тилинде так сүйлөп сабак бере алам деген мугалимдер аз.
6. Программисттер. IT адистерин издегендер да көп, бирок ар кандай талаптар менен, көпчүлүк программист кесибин аяктагандар да алардын талабына жооп бере албай калат.

Роза АКМАТЖАН кызы, “Аймак”