2,196 Бардыгы /

ОШ. Өзгөн “Күрүч фестивалы-2019” ийгиликтүү аяктады. Атагы таш жарган Өзгөн күрүчү буга дейре бүтүн Кыргызстанга жана коңшу Казакстан, Өзбекстан, андан ары Орусиянын бардык аймактарындагы базарларда сатылып келсе, эми Европага дейре экспорттолуп олтурат.

Өзгөн райондук мамлекеттик акимчилиги БУУнун Өнүктүрүү Программасы менен биргеликте Өзгөн районунун Кароол айыл өкмөтүнүн Шералы айылындагы Мамлекеттик сорт сыноо учаскасынын базасында “Түшүмдүүлүгү жогору болгон күрүч өндүрүү боюнча Орусиянын тажрыйбасы Кыргыз Республикасынын шарттарында колдонуу” темасында илимий-практикалык семинар өткөрдү. Бул иш-чараны Өзгөн районунун акими Бактыбек Алайчиев ачып, семинардын катышуучуларына Өзгөн жеринин бренди болгон Өзгөн күрүчүнүн сапатын жогорулатуу боюнча иш алып барылаарын, айтылуу “Кара кылтырык”, “Ак урук” сортторунун башка күрүчтөргө салыштырмалуу организмге пайдалуу заттарынын көптүгү менен айырмаланаарын, күрүч өндүрүүдөгү кээ бир маселер боюнча өзүнүн позиициясын ачыктады. . Ошондой эле семинардын өтүшүнө жакындан жардам берген БУУнун Өнүктүрүү Программасына жана Орусиядан келишкен илимий ишмерлерге терең ыраазычылыгын билдирди.

Аталган семинарда Орусия аймагында өндүрүлүүчү күрүчтүн 14 сорту көрсөтүлүп, Мамлекеттик сорт сыноо участкасында эгилип, сыноодон өтүп жаткандыгы маалымдалды. Сыноодон ийгиликтүү өткөн күрүчтүн сорттору Өзгөн аймагына мындан ары эгиле баштамакчы. Семинарга Орусиянын илимий изилдөө  институтунун өкүлү, айыл чарба илимдеринин доктору В.С.Ковалев жана илимдин кандидаты В.А.Ладатько катышып, күрүчтүн ар бир сорту боюнча түшүндүрмө дагы беришти.

Алишер ТОКСОНБАЕВ, өз кабарчы