1,290 Бардыгы /

БИШКЕК. «Атамекендик товарларды чет өлкөлөрдүн рынокторуна чыгаруу — маморгандар менен бизнестин биргелешкен милдети! — деп баса белгиледи Кыргыз Республикасынын Президенти Сооронбай Жээнбеков «Бишкек» Эркин экономикалык аймагына барып, экспортко багыт алган бир катар атамекендик ишканалардын иши менен таанышып жатып билдирди.

Мамлекет башчысы Сооронбай Жээнбеков өндүрүштүк жарянды, чыгарылган продукцияларды жеринде көрүп, ишкана жетекчилигинин көйгөйлөрүн жеринде тыңдады. «Салкын» ЖЧКсынын байпак өндүрүү боюнча ишканасынын жетекчиси бул ишканага 20 миллион сомдон ашык инвестиция тартылгандыгын билдирди. Өндүрүлгөн продукциялардын басымдуу бөлүгү Казакстандын жана Орусиянын базарларына үстөккө-босток жөнөтүлөт. Натыйжада 200 адам жумуш менен камсыз этилди. Сооронбай Жээнбеков ошондой эле желим, боекторду, курулуш материалдарын жана наристелер үчүн шымдарды чыгарган «Пейванд» ЖЧКсынын иши менен да таанышты. Мында 18 адам иштейт, продукциялар алыскы жана жакынкы чет өлкөлөргө — Орусияга, Казакстанга, Өзбекстанга жана Тажикстанга экспорттолот. Андан соң Президент айыл тургундарын таза суу менен камсыз кылууда пайдаланылуучу буюмдарды, материалдарды жана түтүктөрдү өндүрүүчү «Корона» ЖЧКсынын ишканасына баш бакты. Ишканада 15 адам эмгектенет. 2019-жылдын биринчи жарымында чыгарылган продукциялардын жалпы наркы 1 миллион сомдон ашты. Мамлекет башчысы бул ишкананын социалдык багыттагы ишкана экенин канааттануу менен белгилеп, өндүрүлгөн продукциянын сапаты өлкөбүздүн аймактарын таза суу менен камсыз кылуунун сапатына тикелей таасир эте тургандыгына көңүл бурду. Президент Сооронбай Жээнбеков ишкер менен маектешүүнүн жүрүшүндө инвестицияларды, заманбап технологияларды тартуунун жана жумуш орундарын түзүүнүн абдан маанилүү экендигин дагы бир жолу эске салды. Ал ошондой эле калктын турмуш деңгээлинин жогорулашына өбөлгө жаратуучу экспортко багыт алган ишканаларды мындан ары көбөйтүү, заманбап транспорттук, өндүрүштүк жана социалдык инфрастүзүмдү түзүү зарылдыгын дагы баса белгиледи.

Ал эми ишкерлер тарабынан айтылган бардык көйгөйлүү маселелер боюнча мамлекеттик органдарга тийиштүү сунуштар бериле тургандыгы белгиленди. Аталган ишканаларды кыдырууга Президенттин кеңешчиси Олег Панкратов, экономика министри Санжар Муканбетов, Кыргыз-Орусия өнүктүрүү фондунун башкармасынын төрагасы Эркин Асрандиев катышышты.

Алишер ТОКСОНБАЕВ, өз кабарчы