1,761 Бардыгы /

Бүгүн, 31-август Жалал-Абад шаарында эгемендик күнү салтанаттуу белгиленди.

Ага Өкмөттүн Жалал-Абаддагы ыйгарым укуктуу өкүлү Кыянбек Сатыбалдиев баштаган жетекчилер, шаар мэри Мураталы Тагаев жана жергиликтүү бийлик өкүлдөрү, Чүй облусунан келген аксакалдар делегациясы жана шаар тургундары катышты.

Өкүл Кыянбек Сатыбалдиев сөз сүйлөп, элди эгемендик күнү менен куттуктады.

“Бүгүн улуу салтанат. Улутубуздун үмүтү, тилеги, мүдөөсү ишке ашкан күн. Өз алдынча мамлекет болуп, дүйнө цивилизациясында, адамзаттын улуу көчүндө өз ордубузду таптык деп туу көтөргөн күнүбүз. Сиздерди биздин улуттук майрамыбыз, республикабыздын даңазалуу күнү эгемен Кыргызстандын көз каранды эместигине 28 жыл толушу менен куттуктайм”-дейт.

Шаардын мэри Мураталы Тагаев каалоо-тилегин айтып, жергебизге жакшылыктарды каалады.

“31-август Кыргыз Республикасынын эгемендик күнү майрамы менен чын ыкласымдан куттуктайм. Эгемендүүлүк күнү кыргыз эли үчүн бийик жана ыйык деп эсептейбиз. Бүгүнкү күндө өз алдынча эркин мамлекет, эркин эл болууну самагандар көптөп саналат. Кыргыз элибизди Манас атабыздын арбагы колдосун” – деди мэр өз сөзүндө.

Бул майрам көңүлдүү уланып, элдердин купулуна толгонун айтып жатышты.

“Эгемендүүлүк майрамы кут болсун. Өзүбуздүн жерибиз, суубуз, абабыз өзүбузгө кут кылсын. Кыргыз эли өнүгүп өссүн. Биздин өлкө да өнүгүп өскөн мамлекеттердин катарына кошулсун!”-дейт Максат Жусубалиева, шаар тургуну.

“Бүгүнкү майрам сонун өтүп жатат. Кыргыз элиме майрамдагыдай маанай берсин. Тынччылык, токчулук, молчулук берсин”-дейди Жамийла Бапиева, Кара-Алма айылынын тургуну.

Салтанаттын расмий бөлүгү аяктаган соң,  иш-чара концерттик программа менен коштолду.

“Аймак”