780 Бардыгы /

2-сентябрда Казакстандын Мангистау облусундагы Жаңыөзөн шаарынын жүзгө жакын тургуну акимчилик алдына чогулуп, өлкөдө 55 завод куруу тууралуу Нур-Султан менен Пекиндин ортосундагы өкмөттөр аралык чечимге каршылык билдиришти.

Алар өлкө президенти Касым-Жомарт Токаевге кайрылуу жасашып, анын 11-12-сентябрга Кытайга белгиленген сапарынан баш тартуусун талап кылышты. Мындан тышкары акция катышуучулары бийликтен эмнеге Кытайдан карызга акча алганын түшүндүрүп берүүсүн өтүнүштү.

Акимчиликтин алдына чогулгандарга калаа башчысы Амангали Нурдаулетов чыгып, жашоочуларды тынчытууга аракет кылды. Бирок алар облус акими менен жолугушууну талап кылышты.

Жыйын катышуучуларынын айтымында, жыйынтыгында жергиликтүү тургундар менен жолугушуу үчүн Жаңаөзөнгө Мангистау облусунун акими Серикбай Трумов келет деген чечим кабыл алынып, чогулгандар тарап кетишти. Бул нааразылык акциясына укук коргоо органдары тоскоолдук кылышкан жок.

18-августта Нур-Султандын Аскар Кайырбек аттуу тургуну колуна «Кытайга 55 завод кайра кайтарылсын!» деген жазуусу бар плакат кармап жалгыз пикетке чыккан.

Казакстандын мурдагы президенти Нурсултан Назарбаев быйыл апрелде кытай маалымат каражаттарына интервью берип, өлкөдө 55 ири долбоордун 15и ишке ашырыла баштаганын жана алардын 11и 2019-жылдын аягына чейин пайдаланууга бериле турганын билдирген.

Кытай — Казакстан үчүн төртүнчү ири инвестор жана үчүнчү ири насыя берүүчү болуп эсептелет. Быйыл бул өлкө Казакстанга 2 миллиард 62 миллион юань өлчөмүндө насыя берди. Нур-Султандын Кытайдын алдындагы жалпы карызы 12 миллиард доллардан ашык.

www.