726 Бардыгы /

Казакстанда парламент сенатынын депутаттары жашы жете элек балдарын нааразылык акцияларга алып барган ата-энелерге 252 500 теңге (647 доллар) өлчөмүндө айыппул салып же 10 суткага камакка алууну сунушташты. Бул тууралуу 10-октябрда жергиликтүү басылмалар билдиришти.

Депутаттар мындай өзгөртүүлөр уруксат берилбеген акциялардын катышуучулары балдары менен кошо кармалган учурларды мисал келтирип, митингдер балдардын психикалык саламаттыгына зыян алып келиши мүмкүндүгүн айтышты.

Учурда жашы жете элек баласы административдик укук бузган ата-энелер үчүн 126 250 теңге (324 доллар) өлчөмүндө айыппул каралган.

Өлкөнүн учурдагы мыйзамына ылайык, жарандар митинг өткөрүү үчүн жергиликтүү бийликтен атайын уруксат алышы керек. Административдик кодексте уруксат берилбеген акцияларга катышуу үчүн 330 доллар өлчөмүндөгү айыппул же 15 суткага камакка алуу жазасы каралган. Укук коргоочулар бул мыйзамды сынга алып, ал жарандардын тынч жыйындарды өткөрүү укугун чектей турганын айтып келишет.

Быйыл июнда президент болуп шайланган Касым-Жомарт Токаев бир нече жолу митингдер тууралуу мыйзам кайра каралышы керектигин айткан. Бирок азырынча мыйзамдагы жазаларды жеңилдетүүгө багытталган өзгөртүүлөрдүн долбоору парламентке келип түшө элек.

www.