976 Бардыгы /

АКШнын Жогорку соту молдовалык ишкер Анатол Статинин иши боюнча чечимди кайра кароо тууралуу Нур-Султандын өтүнүчүн четке какты. Бул тууралуу Казакстандын Юстиция министрлиги билдирди.

— АКШнын Жогорку соту 15-октябрдагы токтому менен Казакстанга каршы сот чечимин мажбурлап аткартуу тууралуу Колумбия округундагы апелляциялык соттун чечимин кайра карап чыгуу өтүнүчүн четке какты, — деп жазылган министрликтин билдирүүсүндө.

Былтыр ноябрда округдук сот Статиге Казакстандын Вашингтондогу активдерин камакка алуу боюнча юридикалык чараларды көрүүгө уруксат берген.

Молдовалык ишкер Анатол Стати менен казак өкмөтүнүн ортосундагы соттук териштирүүлөр бир нече жылдан бери уланып келет. Казакстандын мунайгаз тармагына инвестиция салган Стати менен анын уулу Габриэль Стати казак бийлигин алардын менчигин рейдерлик жол менен тартып алууга аракет кылган деп айыптап, келтирилген чыгымды төлөп берүүсүн талап кылышкан. Өз кезегинде Нур-Султан бул дооматтарды четке кагып, Статини алдамчылыкка айыптоодо.

2013-жылы Стокгольм соода палатасынын арбитраждык соту Статинин талаптарын жарым-жартылай канааттандырып, казак өкмөтүн 500 миллион доллар төлөп берүүгө милдеттендирген. Ишкер жалпысынан Казакстандан 4 миллиард доллардан ашык акча өндүрүп берүүнү өтүнгөн.

Быйыл май айында Нидерланд соту Казакстандын «Самрук-Казына» мамлекеттик фондунун голландиялык KMG Kashagan BV ишканасындагы 5,2 миллиард долларлык акцияларын камакка алуу чечимин күчүндө калтырган.

www.