1,290 Бардыгы /

ЖАЛАЛ-АБАД. Бүгүн, 18-октябрь күнү  К.Ш. Токтомаматов атындагы Эл аралык университеттин студенттери Сузак районундагы карылар үйүнөн кабар алышты. Бул тууралуу аталган окуу жайдын кесиптик багыт берүү жана  коомчулук менен байланыштар кызматы маалымдады.

Маалыматка ылайык, Жалал-Абад шаарындагы К.Ш. Токтомаматов атындагы Эл аралык университеттин Эл аралык медициналык колледжинин (ЭАУ ЭАМК) “Медициналык айым иши” адистиги боюнча студенттери Сузак районунун Октябрьск  айылындагы карылар үйүнө колледждин директорунун орун басары С. Я. Сулиеванын жетекчилиги менен  биргеликте барып келишти. ЭАУ ЭАМК студенттеринин бул ирет барып келүүсү мээримдүүлүк иш-чараларынын алкагында болуп өттү. Кабар алган студенттер карылар  менен аңгемелешип, алардын төшөк-жууркандарын алмаштырып, бөлмөлөрүн жыйнап тазалашты. Өздөрү менен бирге азык-түлүк, анын ичинде таттуу азыктар да бар, алып барышып карыларга түшкү тамактанууну уюштурушуп, чакан концерттик программа да тартуулашты. Жагымдуу маанай тартуулаган студенттерге карылар үйүндөгү жашоочулар ыраазычылыгын билдирип, ак батасын беришти.

Белгилей кетсек, бул иш-чара жыл сайын өткөрүлүүчү мээримдүүлүк мазмундагы акция.

“Аймак”