669 Бардыгы /

Европа Биримдигине (ЕБ) мүчө мамлекеттер Брекзиттин мөөнөтүн 2020-жылдын 31-январына жылдырууга макул болду. Бул тууралуу Европа кеңешинин башчысы Дональд Туск «Твиттерге» жазды.

Эгер британ парламенти ЕБден чыгуу боюнча келишимди бул мөөнөткө чейин ратификацияласа, анда Брекзит 31-январдан эрте ишке ашышы мүмкүн.

Адегенде Британиянын Евробиримдиктен 29-мартта чыгары пландалган, бирок бул мөөнөт үчүнчү жолу жылдырылууда.

Британ премьери Борис Жонсон Брекзитти жылдырууга каршы болуп, 31-октябрда келишимсиз болсо да өлкөнү биримдиктин курамынан чыгарып кетүүгө убада берген. Бирок парламент аны бул мөөнөттү жылдырууга милдеттендирди.

Дүйшөмбүдө британ парламенти Жонсондун мөөнөтсүз шайлоо өткөрүү тууралуу сунушун талкуулады. Сунушту жактырыш үчүн оппозициядагы лейбористтердин макулдугу зарыл. Бирок партия премьерден өлкө шаркеттен келишимсиз чыкпайт деген кепилдикти талап кылууда.

Эрте шайлоо өтпөсө, анда парламент Брекзит тууралуу келишимди ратификациялоо маселесин талкуулоого кайтат. Евробиримдик менен Лондон макулдашууга ушул айдын ортосунда жетишкен.

www.