736 Бардыгы /

Кытайдан качып келип, Казакстанда мамлекеттик чек арадан мыйзамсыз өткөн деген айып менен камакка алынган шинжаңдык казактар Кастер Мусаханулы менен Мурагер Алимулына качкын макамын алууга негиз берген күбөлүк тапшырылды. Бул тууралуу адвокат Бауыржан Азанов билдирди.

Анын айтымында, 30-октябрда миграция кызматынын өкүлдөрү тергөө абагына барып, күбөлүктөрдү тапшырып беришти.

Бул боюнча Миграция кызматынын Чыгыш Казакстан облустук башкармалыгынан комментарий алууга мүмкүн болгон жок.

Октябрдын башында Кытайдан качып келгенин айткан Мусаханулы менен Алимулы Алматыдагы миграциялык полицияга баратканда кармалган. 15-октябрда алар Кытай менен чектешкен Чыгыш-Казакстан облусундагы Зайсан шаарына жеткирилген. Учурда алар Өскемен шаарындагы тергөө абагында кармалып турушат.

Маалыматка караганда, 30 жаштагы Кастер Мусаханулы менен 25 жаштагы Мурагер Алимулы 1-октябрда Кытайдын мамлекеттик чек арасынан өтүшкөн. Алар кытай-казак чек арасынын ортосундагы бейтарап аймакта беш күн жүрүп, 6-октябрда Чыгыш Казакстан облусунун Шиликти айылы аркылуу Казакстанга келишкен.

Алар Кытайдын аз улуттун өкүлдөрүнө карата жүргүзүп жаткан саясатына чыдабай, үй-бүлөлөрүн таштап, качып кетүүгө аргасыз болгонун айтышкан. Кастер Мусаханулы 14-октябрдагы маалымат жыйынында Шинжаңдагы “лагерде” болгонун, ал жерде ур-токмокко кабылганын айткан.

30-октябрда өлкөнүн Улуттук коопсуздук комитетинин башчысыДархан Дилманов Мусаханулы менен Алимулы бир жылга эрктеринен ажыратылышы мүмкүндүгүн билдирген. Мындан тышкары ал айыпталуучулардын кытай-казак чек арасынан өтүүсүнө жол берген кызмат адамдары, анын ичинде чек ара тозотунун башчысы менен командири жоопкерчиликке тартылышы керектигин айткан.

www.